ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ކުއްޔަށް ހިފި އިމާރާތެއްގައި މޯލްޑިވްސް މީޑިއާ ޓީވީ ހިންގާކަމަށް ބުނެ، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހްމަދު ނަސީމް ހުށަހެޅުއްވި ކުއްލި މައްސަލަ ވަނީ މަޖިލީހުން ބަލައިނުގަތުމަށް ނިންމާފައެވެ.
މިއަދުގެ މަޖިލިސް ޖަލްސާ ފެށުމުގައި، މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެފައިވަނީ ރައްޔިތުންގެ މަޖިލީހުގެ 197 ވަނަ މާއްދާގެ (ކ) ގައި ކުއްލި މައްސަލައެއްގައި ހުންނަންޖެހޭ ކަމަށް ބަޔާންކުރާ، ހަގީގަތެއްގެ މައްޗަށް ބިނާވެފައިވުމުގެ ޝަރުތު ފުރިހަމަނުވާތީ މި މައްސަލަ ބަލައިނުގަނެވޭނެ ކަމަށެވެ.
މީކާއީލް ހުށަހެޅުއްވި މައްސަލައިގައި ފާހަގަކުރައްވާފައިވަނީ އެންސްޕާގެ އޮފީސް ހިންގުމަށް އިމާރާތެއް ކުއްޔަށް ނެގުމަށް ޖޫން 25 ގައި ކުރެވުނު އިޢުލާނާ ގުޅިގެން، މޯލްޑިވްސް މީޑިއާ ހައުސް ޕްރައިވެޓް ލިމިޓެޑަށް ބިޑު އެވޯޑުކޮށްފައިވާ ކަމަށެވެ. އަދި މި ބިޑުގެ ދަށުން 4 ފްލޯގެ 5 އަހަރު ދުވަހުގެ ކުއްޔަށްވާ 34.8 މިލިއަން ރުފިޔާ އެއްފަހަރާ ދައްކާފައިވާއިރު، އޭގެ ތެރެއިން 2 ފްލޯ އިތުރު ކުއްޔަކާ ނުލައި "އެމްއެމްޓީވީ" އަށް ދީފައިވާކަމަށް ސޯޝަލް މީޑިއާގައި ތުހުމަތުކުރެވެމުންދާ ކަމަށެވެ.
މީގެއިތުރުން، މައްސަލައިގައި ތުހުމަތުކޮށްފައިވަނީ އެތަނުގެ މުވައްޒަފުންނަށް އުޖޫރަ ދެމުންދަނީ ދައުލަތުގެ ބަޖެޓުންކަމަށާއި، ސާމާނު އިމްޕޯޓްކުރުމުގައި ޑިއުޓީ މަޢާފުކޮށްދީފައިވާ ކަމަށެވެ. މި ތުހުމަތުތަކުގައި ހަގީގަތެއް އެކުލެވޭނަމަ، އެއީ ދައުލަތުގެ ޕްރޮކިއޯމަންޓް ނިޒާމު ނަހަމަގޮތުގައި ބޭނުންކޮށްގެން ހިންގާފައިވާ ބޮޑު ހިޔާނާތެއްކަމަށް މައްސަލައިގައި ފާހަގަކޮށްފައިވެއެވެ. މިހާރު މި މައްސަލަ ވަނީ އެންޓި-ކޮރަޕްޝަން ކޮމިޝަން (އޭސީސީ) އިން ތަހުގީގުކުރަން ފަށާފައެވެ.
