ގދ. ތިނަދޫ އަށް ސިޓީއެއްގެ ދަރަޖަ ދިނުމުގައި ގާނޫނާއި ޚިލާފު ކަންތައްތަކެއް ހިންގާފައިވާ ކަމަށް ގަބޫލު ކުރެވޭތީ އާއި އެކަމާއި ގިނަ ބަޔަކު ކަންބޮޑުވުން ފާޅު ކުރަމުން ދާތީ އެ މައްސަލަ ބަލައި ދިނުމަށް އެދި ރައްޔިތުންގެ މަޖިލިހުގެ ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީ ރައްޔިތުންގެ މަޖިލިހަށް މައްސަލައެއް ހުށަހަޅުއްވައިފިއެވެ.
ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީއެއްގައި ސައުދުﷲ ވިދާޅުވެފައި ވަނީ ތިނަދޫ ސިޓީ އަކަށް ގާނޫނުގެ ތެރެއިން ބަދަލުވުމަކީ ތިނަދޫ ކޮންމެ ރައްޔިތަކުވެސް އަދި އޭނާ ވެސް އިންތިހާއަށް ބޭނުންވާ ކަމެއް ކަމަށެވެ.
ނަމަވެސް އެރަށަކީ ސިޓީއެއްކަމުގައި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞޯލިޙް 30 އޮގަސްޓް 2023 ގައި ހަމަޖައްސަވާފައި ވަނީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި ހިލާފަށް ކަމަށް ބެލެވޭ ކަމަށް ސައުދުﷲ ގެ ސިޓީގައިވެއެވެ.
މިކަމުގައި އެރަށު ކައުންސިލުން ވަރަށް ބޮޑެތި އޮޅުވާލުންތައް 2022 އިން ފެށިގެން އޮޅުވާލައި އަތޮޅުގެ ބައެއް ރަށްތަކުގެ ރަޖިސްޓްރީގައި ތިބި ބައެއް މީހުން އެމީހުންނަށް ނޭނގި ތިނަދޫގެ ރަޖިސްޓްރީގައި ހިމަނައި އަދި ތިނަދޫގެ އެތައްބައެއް ޑަބަލްކޮށް ހިމަނައި ގޭގެ ނަމާއި މީހުންގެ ނަންތަކާއި އައިޑީ ކާޑު ނަމްބަރުވެސް އެކި ގޮތްގޮތަށް ބަދަލުކޮށް، މާކުރިން މަރުވެފައިވާ މީހުން ދިރިތިބިކަމަށް ހަދައި، އެތައްދުވަހެއްގެ ކުރިން ރަށްވެހިކަން އެހެންރަށްރަށަށް ބަދަލުވެފައިވާ މީހުންވެސް ތިނަދޫގެ ރަޖިސްޓްރީގައި ހިމަނައިގެން ތިނަދޫގެ އާބާދީ 10،150 ކަމަށް ހަދާފައިވާ ކަމަށް ސައުދުﷲ ވިދާޅުވިއެވެ.
މިކަން ހިނގާފައިވާ ގޮތް ކަމަށް މައުލޫމާތު ލިބިފައިވަނީ ސިޓީއަކަށް ބަދަލު ކުރުމުގެ ޝަރުތުތަށް 10،000 މީހުން ހަމަވާންޖެހޭތީ ތިނަދޫ، މަރުވެފައިވާ މީހުންނާއި، ރަށްވެހިކަން އެހެން ރަށްރަށަށް ބަދަލުވެފައިވާ މީހުންނާއި އައިޑީކާޑް ނުވަތަ މީހުންގެ ނަންތައް ތަކުރާރުކޮށްގެންނާއި ތިނަދޫ ރަޖިސްޓްރީގައި ނުތިބޭނެ ކަމަށް ބެލެވޭ އެހެން ރަށްރަށުގެ މީހުން ހިމަނައިގެން މަކަރާއި ހީލަތާއި އޮޅުވާލައިގެން ތިނަދޫ އާބާދީގައި 10،150 މީހުން ތިބިކަމުގެ ލިސްޓެއް ކަމާބެހޭ ފަރާތަށް ތިނަދޫ ކައުންސިލުން ފޮނުވުމުން ކަމަށް ސައުދުﷲ ވިދާޅުވިއެވެ.
ތިނަދޫ ކައުންސިލުން އާބާދީގައި 10،150 މީހުން ތިބިކަމަށް ލިސްޓް ފޮނުވި ނަމަވެސް އެ އަދަދަށް މީހުން ތިބިކަމަށް އެލްޖީއޭ އަށް ގަބޫލު ނުކުރެވި ލިސްޓް ރެންޑަމްކޮށް ޗެކްކޮށްލި ކޮށްލުމުންވެސް 307 މީހުންގެ އައިޑީ ކާޑް ނަމްބަރ ތަކުރާރުވެފައިވާ ކަމަށް ފާހަގަކުރެވުނު ކަމަށް ސައުދުﷲ ވިދާޅުވިއެވެ.
އަދި ޑީއެންއާރްގެ ހިސާބުތަކުންވެސް 8،000 މީހުންވެސް ހަމަނުވާ ކަމަށް ދައްކާތީ ސިޓީއަކަށް ބަދަލުކުރައްވަން އެލްޖީއޭ އިން އައީ ތަކުރާރުކޮށް އިންކާރު ކުރެއްވި ކަމަށްވެސް ސިޓީގައި ވެއެވެ.
އެހެންކަމުން، ތިނަދޫ ސިޓީއަކަށް ބަދަލުކުރުމުގައި، ދިވެހި އެތައް ބަޔަކު އިންތިހާއަށް ކަންބޮޑުވާ އަދި ޤަނޫނާއި ޚިލާފް އެތައްކަމެއް ހިނގާފައިވާ އަދި އެކަމުގެ ސަބަބުން ކުރިޔަށް އޮތްތާގައިވެސް އެފަދަ ކަންކަން ހިނގާފާނެ ކަމަށް ބެލެވޭތީ އާއި އަދި މިކަން ރައްޔިތުންގެ މަޖިލިހަށް ހުށަހަޅައިގެން ބެލުމަށް ދާއިރާގެ ގިނަ ރައްޔިތުންތަކެއް އެދެމުންދާތީ، މިކަން ރައްޔިތުންގެ މަޖިލިސްގެ ކަމާ ގުޅުންހުރި ކޮމިޓީތަކުން ބެލުމަށް ސައުދުﷲ އެދިވަޑައިގެންނެވިއެވެ.
