ސުޕްރީމް ކޯޓާއި ހައިކޯޓުވެސް އަހަރީ ރިސެސްއަށް ގޮސްފިއެވެ. ސުޕްރީމް ކޯޓުން އިއުލާންކޮށްފައިވާ ގޮތުގައި ކޯޓުތަކުގެ ގާނޫނުގެ 7 ވަނަ މާއްދާގެ ދަށުން އެ ކޯޓު ރިސެސްގައި އޮންނާނީ ނޮވެންބަރު މަހުގެ އެންމެ ފަހު ރަސްމީ މަސައްކަތު ދުވަހުން ފެށިގެން ޖެނުއަރީ 1 ވަނަ ދުވަހާ ހަމައަށެވެ.
ރިސެސްގެ މުއްދަތުގައި، ގާނޫނުއަސާސީ ނުވަތަ ގާނޫނެއްގެ ދަށުން ވަކި މުއްދަތެއްގެ ތެރޭގައި ނިންމަންޖެހޭ މައްސަލަތައް ފިޔަވައި އެހެން އެއްވެސް ޝަރީއަތެއްގެ އަޑުއެހުމެއް ނުބޭއްވޭނެއެވެ. ނަމަވެސް ކޯޓަށް މައްސަލަތައް ބަލައިގަތުމާއި އެހެނިހެން އިދާރީ މަސައްކަތްތައް މެދުކެނޑުމެއްނެތި ކުރިއަށްދާނެކަމަށް ސުޕްރީމް ކޯޓުން ބުނެފައިވެއެވެ.
ކޯޓުތަކުގެ ގާނޫނުގައި ބަޔާންކޮށްފައިވާ ގޮތުން، އެކަށީގެންވާ ހަލުވިމިނެއްގައި މައްސަލަތައް ނިންމުމަށްޓަކައި، ސުޕްރީމް ކޯޓުގެ އަޣުލަބިއްޔަތުން ނިންމައިފިނަމަ ރިސެސްގައިވެސް ޝަރީއަތުގެ އަޑުއެހުންތައް ބޭއްވިދާނެއެވެ. އަދި ރިސެސްގައި ވަނިކޮށް ކުއްލި ނުރައްކަލުގެ ހާލަތު އިއުލާންކޮށްފިނަމަ، އެ ހިނދުން ފެށިގެން ރިސެސް ނިމުމަކަށް އައިސް، ކުރިން ހިނގަމުންދިޔަ ދައުރު އަލުން ފެށޭނެއެވެ.
ހައިކޯޓުގެ ރިސެސް ފެށިގެންދިޔައީ އިއްޔެއިން ފެށިގެން ޑިސެންބަރު މަހުގެ ނިޔަލަށެވެ. ނަމަވެސް ރިސެސްގެ މުއްދަތުގައިވެސް ބީ12 ސެކްޝަނުގެ މައްސަލަތަކާއި، މޮނިކޮން އަމުރުތަކާއި، އަވަސް ތަބީއަތުގެ އަމުރުތަކާއި، ހުކުމް ތަންފީޒުކުރުން ފަސްކުރުމުގެ އަމުރުތަކާއި، އިޖުރާއީ އިއުތިރާޒާ ގުޅޭ ނިންމުންތަކުގެ ތެރެއިން މުއްދަތު ހަމަވާ މައްސަލަތައް ކުރިއަށްގެންދިއުމަށް ފަނޑިޔާރުންގެ އާންމު މަޖިލީހުން ވަނީ ނިންމާފައެވެ. މީގެއިތުރުން ރިސެސްގެ މުއްދަތުގައި ހުކުމްކުރުމަށް ބާއްވާ ޝަރީއަތުގެ މަޖިލިސްތައްވެސް ބޭއްވޭނެއެވެ.
އަދި ކްރިމިނަލް ކޯޓުގެ ރިސެސް ފެށުމަށް ހަމަޖެހިފައިވަނީ ކޮންމެ އަހަރެއްގެވެސް ޑިސެންބަރު މަހުގެ 15 އިން އެ މަސް ނިމުމާ ހަމައަށެވެ.
