އިސްރާއިލްގެ ބޮޑުވަޒީރު ބެންޖަމިން ނަތަންޔާހޫ ރާއްޖެ އަތުވެއްޖެނަމަ ހައްޔަރުކުރެވޭނެ ކަމަށް ހޯމް މިނިސްޓަރު އަލީ އިހުސާން ވިދާޅުވެެއްޖެވެ. މިކަން އޭނާ ހާމަކުރެއްވީ ސޯޝަލް މީޑިއާގައި ކުރެވުނު ސުވާލަކަށް ޖަވާބު ދެއްވަމުން، ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާ ނުކޮށް ތަންފީޒުކުރާނެ ޤައުމެއްކަން ފާހަގަކުރައްވަމުންނެވެ.
ބައެއް މީޑިއާތަކަށް މައުލޫމާތު ދެއްވަމުން އިހުސާން ވިދާޅުވީ ނަތަންޔާހޫ ހައްޔަރުކުރުމަށް ނެރެފައިވާ އަމުރު ރާއްޖޭގައި ތަންފީޒުކުރެވޭނެ ކަމަށެވެ. ބައިނަލްއަޤްވާމީ ޖިނާއީ ކޯޓު (އައިސީސީ) އިން ވަނީ މީގެ ހަފްތާއެއް ކުރިން ނަތަންޔާހޫގެ އިތުރުން ޑިފެންސް ސެކްރެޓަރީ ޔޯވް ގަލަންޓް ހައްޔަރުކުރުމަށް އަމުރެއް ނެރެފައެވެ.
މި އަމުރާ ގުޅިގެން ރައީސް ޑރ. މުޙައްމަދު މުއިއްޒު ވެސް ވަނީ ބައިނަލްއަޤްވާމީ ޖިނާއީ ކޯޓުން އަޅާ ފިޔަވަޅުތަކަށް ރާއްޖެއިން އިޙްތިރާމްކުރާ ކަމަށާއި އެ ކޯޓުގެ ނިންމުންތައް ތަންފީޒުކުރުމުގެ މުހިންމުކަން ފާހަގަކުރައްވާފައެވެ.
އިސްރާއީލުން ޣައްޒާގައި ހިންގަމުންދާ ގަތުލުއާންމާ ގުޅިގެން، އެ ޤައުމުގެ ޕާސްޕޯޓް މަނާކުރުމަށް ސަރުކާރުން ނިންމައި ރައްޔިތުންގެ މަޖިލީހަށް ބިލެއް ހުށަހަޅާފައިވެއެވެ. އެހެންނަމަވެސް، ވެރިކަންކުރާ މައި ޕާޓީ ޕީއެންސީގެ އަޣުލަބިއްޔަތު އޮތް މަޖިލީހުގައި މި ބިލުގެ މަސައްކަތް ލަސްވަމުންދާތީ، ސަރުކާރަށް ފާޑުކިޔުން އަމާޒުވަމުންދެއެވެ. އަދި މިހާރު ޕީއެންސީގެ މެންބަރުން ވަނީ ޕާސްޕޯޓް މުޅިން މަނާނުކުރާ ގޮތަށް ވާހަކަދައްކަން ފަށާފައިވާތީ، ގިނަ ބައެއްގެ ނުރުހުން އެކަމާމެދު ފާޅުވަމުންދެއެވެ.
