މިއަހަރު އަލަށް މުދައްރިސުކަން ކިޔަވަން 600 އަށްވުރެ ގިނަ ދަރިވަރުން ފަށާފައިވާކަމަށް ތަޢުލީމީ ކަންތައްތަކާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ. މި އަދަދަކީ ވޭތުވެދިޔަ 10 އަހަރާ އަޅާބަލާއިރު އެންމެ ގިނަ އަދަދުކަމަށް ވަޒީރު ފާހަގަކުރެއްވިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ވަޒީރު ވިދާޅުވީ ފާއިތުވި އެއް އަހަރު ދުވަހުގެ ތެރޭގައި އެންމެ މުހިންމު ކަމެއްގެ ގޮތުގައި މުދައްރިސުންނަށް ދޭންޖެހޭ ގަދަރާއި އިޙްތިރާމް އަލުން އަނބުރާ ހޯދައިދެވިފައިވާކަމަށެވެ. މީގެ ކުރިން މުދައްރިސުންނާއި ޕްރިންސިޕަލުންނަށް އެކި ގޮތްގޮތުން ފިޔަވަޅު އަޅަމުން އައި ނަމަވެސް، މިދިޔަ އަހަރުގެ ތެރޭގައި އެފަދަ އެއްވެސް ފިޔަވަޅެއް އަޅާފައިނުވާކަމަށް ވަޒީރު ފާހަގަކުރެއްވިއެވެ.
ތަޢުލީމީ ދާއިރާއަށް މިހާރުން މިހާރަށް 2400 އަށްވުރެ ގިނަ މުދައްރިސުން ބޭނުންވާއިރު، އޭގެ ތެރޭގައި ޕްރައިމަރީ މުދައްރިސުންގެ ގޮތުގައި 250 މުދައްރިސުން ހިމެނެއެވެ. މި ދަތިކަމަށް ހައްލެއް ހޯދުމަށްޓަކައި މުދައްރިސުން ތަމްރީނުކުރުމުގެ ޤައުމީ ޕްރޮގްރާމެއް ވަނީ ފަށާފައެވެ. މި ޕްރޮގްރާމުގެ ދަށުން މިހާރު ވަނީ 135 ދަރިވަރަކަށް ސްކޮލަރޝިޕް ދެވިފައެވެ. އަދި ކޮންމެ އަހަރަކު މަދުވެގެން 150 ދަރިވަރުން ތަމްރީނުކުރުމަކީ ސަރުކާރުގެ އަމާޒެކެވެ.
މި ޕްރޮގްރާމުގެ ދަށުން ދަރިވަރުންނަށް މަހަކު 1500 ރުފިޔާގެ ސްޓައިޕެންޑެއް ދިނުމަށް ވަނީ ހަމަޖެހިފައެވެ. ތަޢުލީމީ ކަންތައްތަކާ ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މުދައްރިސުން ތަމްރީނުކުރުމުގެ މި ޕްރޮގްރާމް ރޭވިފައިވަނީ މުދައްރިސުން ލިބުން ދަތިވާ މާއްދާތަކާއި ރަށްތަކަށް އަމާޒުކޮށް، އެކަމަށް ދާއިމީ ހައްލެއް ލިބޭނެ ގޮތަކަށެވެ.
