އިންޑިއާއިން ރާއްޖެއަށް ދޫކޮށްފައިވާ ކާޑުގެ ބާވަތްތަކުގެ ކޯޓާގައި އުސޫލުން ބޭރުން ލަންކާއަށް ހަކުރު އެތެރެކުރާ މައްސަލައެއް ފެންމަތިވެފައިވީ ނަމަވެސް، ރާއްޖެއަށް ކާޑުގެ ބާވަތްތައް އެތެރެކުރުމުގައި އެއްވެސް ދަތިކަމެއް ކުރިމަތިވެފައި ނުވާކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މިއަދު ހާމަކޮށްފިއެވެ.
އެސްޓީއޯގެ މީޑިއާ އޮފިޝަލު ބައެއް މީޑިއާތަކަށް މައުލޫމާތު ދީފައިވާ ގޮތުގައި، ރާއްޖެއަށް ކާޑުގެ ބާވަތްތައް އެތެރެކުރުމަށް ދޫކޮށްފައިވާ ކޯޓާއިން އެހެން ގައުމަކަށް ކާޑު އެތެރެކުރަމުންދާ ކަމުގެ މައްސަލައެއް ފެންމަތިވެފައިވާކަން ފާހަގަކުރެއްވިއެވެ. ނަމަވެސް މި މައްސަލައިގެ ސަބަބުން އިންޑިއާއިން ރާއްޖެއަށް ކާޑު އެތެރެކުރުމަށް އެއްވެސް ހުރަހެއް ދިމާވެފައި ނުވާ ކަމަށާއި، އަދި ރައްޔިތުންނަށް އެސްޓީއޯއިން މެނޭޖް ނުކުރެވޭވަރުގެ ދަތިކަމެއް ތަހައްމަލު ކުރަން ޖެހިގެން ނުދާނެކަމުގެ ޔަގީންކަން ދެއްވިއެވެ.
އިންޑިއާގެ ބައެއް މީޑިއާތަކުން ރިޕޯޓުކޮށްފައިވާ ގޮތުން، ރާއްޖެއަށް ކާޑުގެ ބާވަތްތައް އެތެރެކުރުމަށް ދޫކޮށްފައިވާ ކޯޓާގެ ދަށުން ލަންކާއަށް ހަކުރު ބޭރުކުރާ މައްސަލައެއް ފެންމަތިވެ، ކާޑުގެ ބާވަތްތަކުގެ ތެރެއިން އިންޑިއާއިން ރާއްޖެއަށް ހަކުރު ބޭރުކުރުން މަޑުޖެހިފައިވެއެވެ. މި މައްސަލަ މިހާރު ވަނީ އިންޑިއާގެ ޑައިރެކްޓަރޭޓް ޖެނެރަލް އޮފް ފޮރިން ޓްރޭޑުގެ ސަމާލުކަމަށް އައިސް، އެކަން ސީރިއަސްކޮށް ބަލަމުންދާ ކަމަށްވެސް އެ މީޑިއާތަކުން ފާހަގަކޮށްފައިވެއެވެ.
އެސްޓީއޯގެ އޮފިޝަލް އިތުރަށް ފާހަގަކުރެއްވި ގޮތުގައި، މީގެ ކުރިން އިންޑިއާއިން ފިޔާ އެކްސްޕޯޓްކުރުން ހުއްޓާލި ދުވަސްވަރުވެސް، އެސްޓީއޯއިން ވަނީ ރާއްޖެއަށް ފިޔާ އެތެރެކޮށް، ރާއްޖޭގެ ބާޒާރުގައި އޭރު އޮތް ފިޔާ ލިބުމުގެ ދަތިކަމަށް ހައްލު ހޯދައިދީފައެވެ. އަދި މި މައްސަލައާ ގުޅިގެން އިތުރު މަޢުލޫމާތު ލިބުމުން އެކަން އާންމުކުރާނެ ކަމަށްވެސް އެސްޓީއޯއިން ބުނެފައިވެއެވެ.
