މޭރީ ގްރޭސް އޮނެޑް ޕިނެޑާގެ މަރުގެ މައްސަލައިގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ދޫކޮށްލުމާމެދު ދައުލަތުން ހުށަހެޅި މައްސަލަ މިއަދު ހައިކޯޓުން ބޭރުކޮށްލައިފިއެވެ. މިދިޔަ ހަފުތާގެ ބުރާސްފަތި ދުވަހު ދައުލަތުން ހުށަހެޅި މި މައްސަލަ ބޭރުކޮށްލީ ހައިކޯޓުގެ ރަޖިސްޓްރާއެވެ.
އައިޖީއެމްއެޗްގެ ނަރުހެއްގެ ގޮތުގައި މަސައްކަތްކުރި ފިލިޕީންސް ރައްޔިތު މޭރީގެ މަރާ ގުޅިގެން ތުހުމަތުކުރެވޭ ލަމްހާ މިދިޔަ ހަފުތާގައި ކްރިމިނަލް ކޯޓުން ދޫކޮށްލާފައިވަނީ ހަ ޝަރުތަކާ އެކުގައެވެ. މި ޝަރުތުތަކުގެ ތެރޭގައި ރާއްޖެއިން ފުރައިގެން ނުދިއުމާއި، ގާނޫނާ ހިލާފު އަމަލެއް ނުކުރުމާއި، ކޯޓަށް ގަޑިއަށް ހާޒިރުވުމާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމާއި، ވަކި ގަޑިތަކެއްގައި ގޭގައި ހުރުން ހިމެނެއެވެ.
މި މައްސަލައިގައި ދައުލަތުން ވަނީ ލަމްހާގެ މައްޗަށް ތިން ދައުވާއެއް އުފުލާފައެވެ. އޭގެ ތެރޭގައި މޭރީގެ މަރުގައި އެހީތެރިވެދިނުމުގެ ދައުވާ ހިމެނޭއިރު، މޭރީގެ ފިރިމީހާ މާވިންގެ މައްޗަށް ގަސްތުގައި މީހަކު މަރާލުމުގެ ދައުވާ ކޮށްފައިވެއެވެ.
ފާހަގަކޮށްލެވޭ ކަމަކީ މިދިޔަ އަހަރުވެސް ކުއްލި ގޮތަކަށް ކްރިމިނަލް ކޯޓުން ލަމްހާ ދޫކޮށްލި ނަމަވެސް، އެއީ ގާނޫނާ ހިލާފަށް ކަމަށް ކަނޑައަޅައި، ހައިކޯޓުން އޭނާ އަލުން ޝަރީއަތް ނިމެންދެން ބަންދުކުރުމަށް އަމުރުކުރި ކަމެވެ. އަދި ލަމްހާ ދެ ފަހަރެއްގެ މަތިން ދޫކޮށްލެވުނު ނަމަވެސް، މި މައްސަލައިގައި ދައުވާލިބޭ މާވިން އަދިވެސް ދަނީ ބަންދުގައި ހުންނަމުންނެވެ.
