މިރޭ މޯލްޑިވްސް ޑިވެލޮޕްމަންޓް ބޭންކުގެ އޮފީސް ބީސީސީ އިމާރާތުގައި ރަސްމީކޮށް ހުޅުވައިފިއެވެ. މި އޮފީސް ހުޅުވައިދެއްވީ ރައީސް ޑރ. މުޙައްމަދު މުޢިއްޒެވެ.
މި އަހަރުގެ މެއި މަހު އުފެއްދި މި ބޭންކަކީ އުމްރާނީ ތަރައްގީއަށް ލޯނު ދޫކުރުމަށް ޚާއްޞަކުރެވިފައިވާ ބޭންކެކެވެ. އަދި މި ބޭންކަށް މޯލްޑިވްސް މަނިޓަރީ އޮތޯރިޓީން ވަނީ މިދިޔަ އޮކްޓޯބަރު 13 ގައި އަހަރު ދުވަހުގެ މުއްދަތަށް ބޭންކިންގ ލައިސަންސް ދޫކޮށްފައެވެ.
ސަރުކާރުން ބުނާގޮތުގައި، މި ބޭންކު އުފެއްދުމުގެ މައިގަނޑު މަޤްޞަދަކީ ދެމެހެއްޓެނިވި އިޤްތިޞާދީ އަދި އިޖްތިމާޢީ ތަރައްޤީއަށް އިންވެސްޓްކުރުމާއި، އުމްރާނީ ތަރައްޤީއަށް ބޭނުންވާ ފައިނޭންސިންގ ފޯރުކޮށްދިނުމެވެ. މީގެއިތުރުން، ޕީއެސްއައިޕީ މަޝްރޫޢުތަކަށް ފައިސާ ހޯދުމުގައި ދިމާވާ ގޮންޖެހުންތައް ހައްލުކުރުމާއި، ރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުން ހިމެނެއެވެ.
މި ބޭންކުގެ ޗެއަރޕާސަންގެ މަޤާމަށް އައްޔަންކޮށްފައިވަނީ އޭޝިއާގެ ބޭންކިންގ ދާއިރާގެ ތަޖުރިބާކާރެއް ކަމަށްވާ، ސިންގަޕޫރުގެ ރައްޔިތެއް އަރުނީ ގުނަތިލެކެއެވެ. އޭނާ ވަނީ ލަންކާގެ ކޮލަމްބޯ ޔުނިވަރސިޓީން ފުރަތަމަ ޑިގްރީއާއި އެމެރިކާގެ ހާވަރޑް ޔުނިވަރސިޓީން މާސްޓަރސް ޑިގްރީ ހާސިލުކޮށްފައެވެ.
އަދި ބޭންކުގެ ސީއީއޯގެ މަޤާމަށް އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން-ޖޯންސް ވަނީ އައްޔަންކޮށްފައެވެ. އޭނާއަކީ ދެކުނު އެފްރިކާގެ ކޭޕް ޓައުން ޔުނިވަރސިޓީން ފުރަތަމަ ޑިގްރީއާއި އޮކްސްފޯޑް ޔުނިވަރސިޓީން މާސްޓަރސް ޑިގްރީ ހާސިލުކޮށްފައިވާ، ބޭންކިންގ ދާއިރާގައި 28 އަހަރުގެ ތަޖުރިބާ ލިބިފައިވާ ބޭފުޅެކެވެ.
