މިފްކޯގެ ފަސްމީރު އުފެއްދުންތަކުގެ ވިޔަފާރިން 2023 ވަނަ އަހަރު ފާހަގަކުރެވޭ ކުރިއެރުމެއް ހޯދާފިއެވެ. މިފްކޯގެ މާލީ ރިޕޯޓުގައިވާ ގޮތުން، 2022 ވަނަ އަހަރު އެކުންފުންޏަށް 258 މިލިއަން ރުފިޔާ ލިބުނު އިރު، 2023 ވަނަ އަހަރު މި އަދަދު 322 މިލިއަން ރުފިޔާއަށް އަރާފައިވެއެވެ. މިއީ 35 އިންސައްތައިގެ ކުރިއެރުމެކެވެ.
ދަޅުމަހާއި ޕައުޗްގައި ބަންދުކުރި މަހުގެ ވިޔަފާރިންވެސް ފާހަގަކުރެވޭ ކުރިއެރުމެއް ލިބިފައިވެއެވެ. 2022 ވަނަ އަހަރު 229 މިލިއަން ރުފިޔާ ލިބުނުއިރު، 2023 ވަނަ އަހަރު މި އަދަދު 287 މިލިއަން ރުފިޔާއަށް އިތުރުވެފައިވެއެވެ. އަދި އާންމުންގެ މެދުގައި މަޤުބޫލު އުފެއްދުމެއް ކަމުގައިވާ ވަޅޯމަހުގެ ވިޔަފާރިންވެސް ކުރިއެރުން ލިބި، 2022 ވަނަ އަހަރު 17 މިލިއަން ރުފިޔާ ލިބުނު އިރު، 2023 ވަނަ އަހަރު 24 މިލިއަން ރުފިޔާ ލިބިފައިވެއެވެ.
ގަނޑުކުރި ކަންނެލީގެ ވިޔަފާރިންވެސް ކުރިއެރުން ލިބި، 2022 ވަނަ އަހަރު 8.14 މިލިއަން ރުފިޔާ ލިބުނު އިރު، 2023 ވަނަ އަހަރު 10.5 މިލިއަން ރުފިޔާގެ އާމްދަނީއެއް ލިބިފައިވެއެވެ. މީގެ އިތުރުން ގަނޑުކުރި ކަންނެލި، ދަޅުގައި އަދި ޕައުޗްގައި ބަންދުކުރި މަހާއި ފިޝްމީލްގެ ގޮތުގައި އެކްސްޕޯޓްކުރެވުނު މިންވަރުވެސް ވަނީ އިތުރުވެފައެވެ.
ސަރުކާރުގެ އަމާޒަކީ މިފްކޯއަށް ލިބޭ މަހުގެ ބޮޑު އިންސައްތައެއް އަގު އެއްކުރެވިފައިވާ މަހުގެ ގޮތުގައި ރާއްޖެއިން ބޭރަށް އެކްސްޕޯޓްކުރުމެވެ. މިކަމުން ކުންފުންޏަށް ލިބޭ އާމްދަނީ 2 ގުނައަށް އިތުރުވާނެ ކަމަށް ސަރުކާރުން ވަނީ ފާހަގަކުރައްވާފައެވެ.
