ރައީސް ޑރ. މުހައްމަދު މުއިއްޒުގެ ސަރުކާރަށް އެއް ކަމެއް ވެސް ނުވާ ކަމަށާއި "ގާބުރިއެއް" ހިސާބު ވެސް ނުބޭއްވޭ ކަމަށް މާލޭގެ މޭޔަރު އާދަމް އާޒިމް ރޭ ވިދާޅުވެއްޖެއެވެ.
"ފުދިއްޖެ، ފުނޑިއްޖެ" މި ނަމުގައި އެމްޑީޕީން އާޓިފިޝަލް ބީޗުގައި ބޭއްވި ޖަލްސާގައި އާޒިމް ވިދާޅުވީ މި ސަރުކާރުން ހަދަނީ ހުސް ދޮގު ކަމަށާއި ދޮގު ހަދަ ހަދާ ގޮސް އެޑިކްޓުވެފައިވާ ކަމަށެވެ. އެހެންވެ، ރާއްޖޭގައި ހުޅުވަން ޖެހޭ ރީހެބްތައް ފުދޭ ވަރަކަށް ގިނަވެފައިވާ ކަމަށާއި ދޮގު ހެދުމަށް ވެސް ރީހެބެއް ބޭނުންވާ ކަމަށް އާޒިމް ވިދާޅުވިއެވެ.
އާޒިމް މި ސަރުކާރަށް ޖޯކު ޖައްސަވަމުން ވިދާޅުވީ ކުރީގެ ސަރުކާރުތަކުން ފުރިހަމަކޮށްފައި ހުރި މަޝްރޫއުތައް މި ސަރުކާރުން ހުޅުވަން ތައްޔާރުވަމުން އަންނަ ކަމަށެވެ. އެއް މަޝްރޫއަކަށް އާޒިމް ފާހަގަ ކުރެއްވީ ދަރުމަވަންތަ ހޮސްޕިޓަލް ހުޅުވުމެވެ. އާޒިމް ވިދާޅުވީ، މިދާ ރޭޓުން އީދު މިސްކިތާއި ހުކުރު މިސްކިތް ވެސް ހުޅުވާނެ ކަމަށެވެ.
"އެއް ކަމެއް ވެސް ނުވަނީއޭ. ގާބުރިއެއް ވެސް ނުބޭއްވުނު އެއް އަހަރުވެގެން ދިޔައީ." އާޒިމް ވިދާޅުވިއެވެ.
އާޒިމް ވިދާޅުވި ގޮތުގައި ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ކޮންމެ 11 ދުވަހަކުން މަޝްރޫއެއް ނިންމާލާފައި އޮންނާނެ ކަމަށެވެ. އެކަމަކު، ކުރިއަށް އޮތް ތިން އަހަރު ވެސް މި ސަރުކާރަށް އެއް ކަމެއް ވެސް ނުވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މި ސަރުކާރު އައި ފަހުން ކަރަންޓު ބިލާއި ފެން ބިލް ތިން ގުނަ ބޮޑުވެފައިވާ ކަމަށެވެ. އަދި މި ސަރުކާރުގެ އެއްވެސް ކަހަލަ އިސްތިރާޖީ ޕްލޭނެއް ނެތް ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން ސަރުކާރުގައި ނެތޭ ނުދެއްކޭ ވަރުގެ ލޯނެއް ނަގާފައި. އައި ގޮތަށް އައިސް 35 މިލިއަން ޑޮލަރު ދީފައި ދޫނިތަކެއް ނުގެންނާނެ،" ރާއްޖޭގެ އިގްތިސާދީ ސަރަހައްދު ބެލެހެއްޓުމަށާއި ސާޗް އެންޑް ރެސްކިއު އޮޕަރޭޝަންތަކަށް ގެނައި ޑްރޯންތަކަށް ފާޑު ކިޔުއްވަމުން އާޒިމް ވިދާޅުވިއެވެ.
އާޒިމް ވިދާޅުވީ ރާއްޖޭގެ އިގްތިސާދު ހަލާކުވެ، ވިޔަފާރިތައް ވެސް ފުނޑެމުން އަންނަ ކަމަށާއި މި ސަރުކާރާ އެކު ތިބޭނީތޯ ނުވަތަ ނުތިބޭނީތޯ ވެސް ނިންމަން ޖެހޭ ކަމަށެވެ. އެމްޑީޕީ ސަރުކާރުން ބިން ކަނޑައަޅައި ފްލެޓުތައް ހެދިއިރު، އެ ތަންތަން އަދިވެސް ރައްޔިތުންނާ ހަވާލު ނުކުރެވޭ ކަމަށް އޭނާ ވިދާޅުވިއެވެ.
"އަޅުގަނޑުމެން ސަރުކާރުން ބިން ދިނީ މޫދުންނޭ ބުނީ. މި ބޭފުޅުން ބިން ދިނީ ކަނޑު އަޑިން ނޫންތޯ؟ އަޅުގަނޑުމެން ދިނީ 1 ފޫޓުން، އެބޭފުޅުން ދިނީ 100 ފޫޓު އަޑިން." އާޒިމް ވިދާޅުވިއެވެ.
އާޒިމް ވިދާޅުވީ އެމްޑީޕީގެ ސަރުކާރުގައި އިގްތިސާދު ހުރީ ބަރާބަރަށް ކަމަށާއި މި ސަރުކާރުން 2،200 ވަޒީފާ ނަގާނީ ބަޖެޓުގައި ފައިސާ ހުރީމަ ކަމަށެވެ. ރާއްޖެ އޮތީ ދަރާފައި ނޫން ކަމަށާއި މި ސަރުކާރު ވެރިކަމަށް އައިސް ރާއްޖެ ދަރުވާލީ ކަމަށް އޭނާ ވިދާޅުވިއެވެ.
