މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު، ޖަލުގައި ގައިދީންތަކަކަށް މަރުގެ އިންޒާރުދިން މައްސަލައެއް ފުލުހުން ތަހުގީގު ކުރަމުންދާކަން އެނގިއްޖެއެވެ.
މި މައުލޫމާތު ހާމަވެގެން ދިޔައީ މިއަދު ހެނދުނު ބޭއްވި ޝަރީއަތުގެ މަޖިލީހުގައި، ލަމްހާގެ ބަންދު މުރާޖައާ އާ ގުޅޭގޮތުން ދައުލަތުން ދެއްކި ވާހަކައިންނެވެ.
މިދިޔަ ބުރާސްފަތި ދުވަހު ވެސް ދައުލަތުން ވަނީ އޭނާ ޝަރުތުތަކާއެކު ގޭބަންދަށް ބަދަލުކުރުމާ ދެކޮޅު ހަދާފައެވެ. މިއަދުގެ އަޑުއެހުމުގައި ދައުލަތުގެ ވަކީލު އައިޝަތު އަޒްލީނާ ވިދާޅުވީ އޭނާގެ ފުށުން މުޖުތަމައުއަށް އޮތް ނުރައްކާ އަދިވެސް ކުޑަނުވާ ކަމަށެވެ. އަދި އޭގެ ހެއްކެއްގެ ގޮތުގައި ލަމްހާ ޖަލުގައި ގައިދީންތަކަކާމެދު މާރާމާރީ ހިންގައި، އެ ގައިދީންނަށް މަރުގެ އިންޒާރު ދިންކަން ފާހަގަކުރެއްވިއެވެ.
ދައުލަތުގެ ވަކީލު އައިމިނަތު ޝާމާ ނަސީރު ވިދާޅުވި ގޮތުގައި މި މައްސަލައަކީ މިދިޔަ އެޕްރީލް މަހު ގައިދީން ތަކެއް ހިއުމަން ރައިޓްސް ކޮމިޝަނަށް ހުށަހެޅި މައްސަލައެކެވެ. އެޗްއާރްސީއެމްއިން ވަނީ ހަމަ އެމަހު މި މައްސަލަ ފުލުހުންނާ ހިއްސާކޮށްފައެވެ.
މިކަމާ ގުޅިގެން ލަމްހާގެ ވަކީލު އަހުމަދު ޔާމީން ފާހަގަކުރެއްވީ، އެފަދަ މައްސަލައެއްގެ ނޯޓިފިކޭޝަނެއް ދައުލަތުން ކުރިން ނުދީ، މިއަދު ކުއްލިއަކަށް ޝަރީއަތުގެ މަޖިލީހުގައި އެ ވާހަކަ ދެއްކެވުމަކީ ޒިންމާދާރު ގޮތެއް ނޫންކަމަށެވެ.
އެހެންނަމަވެސް، މި މައްސަލަ ބައްލަވާ ގާޒީ ހުސެއިން ފާއިޒް ރަޝާދު ވިދާޅުވީ މި ހާދިސާގެ ވާހަކަ މީގެ ކުރިން ދައުލަތުން ފާހަގަކޮށްފައި ނުވާތީ އާއި، އޭނާގެ ފުށުން އިތުރު ނުރައްކަލެއް އޮންނާނެ ކަމަށް ނުފެންނާތީ، ލަމްހާ ތިން މަސްދުވަހުގެ މުއްދަތަށް ބަންދުން ދޫކޮށްލުމަށް ނިންމަވާފައިވާ ކަމަށެވެ.
