އާސަންދަ ނިޒާމަށް ގެންނަ ބަދަލުތަކާ ގުޅިގެން ރައްޔިތުން ކަންބޮޑުވާން ޖެހޭނެ އެއްވެސް ސަބަބެއް ނެތް ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެއެވެ. ހެލްތު އެކްސްޕޯ ފެށުމުގެ ރަސްމިއްޔާތުގައި މިނިސްޓަރު ވާހަކަފުޅު ދައްކަވަމުން ފާހަގަކުރެއްވި ގޮތުގައި، އާސަންދަ ނިޒާމު ހަރުދަނާ ކުރުމަކީ ސިއްހީ ދާއިރާއިން ރައްޔިތުންނަށް ފޯރުކޮށްދެވޭ ހިދުމަތްތައް އެންމެ ރަނގަޅު ފެންވަރެއްގައި ދެމެހެއްޓުމަށް ކޮންމެހެން ބޭނުންތެރި ކަމެކެވެ.
މިނިސްޓަރު ވިދާޅުވި ގޮތުގައި، ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން މިހާރު ކުރިއަށްދާ އާސަންދަ ރިފޯމްގެ މަސައްކަތުން އުފެދިގެންދާނީ ރައްޔިތުންނަށް އުއްމީދު ގެނެސްދޭ، އަދި އެއްވެސް ބުރައެއް ނެތި، ދެމެހެއްޓެނިވި ގޮތެއްގައި ހިންގޭނެ ސިއްހީ ނިޒާމެކެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، އާސަންދަ އިންޝުއަރެންސް ސްކީމުގެ ފައިދާ އެންމެ ބޭނުންވާ ފަރާތްތަކަށް ލިބި، ނިޒާމުގައި ހުރި "ލޫޕްހޯލްތައް" ބަންދުކުރުމަކީ މި ނިޒާމު ދެމެހެއްޓުމަށް ކޮންމެހެން މުހިންމު ކަމެކެވެ. އެތައް ފަންނީ މާހިރުންނެއް މިހާރު ވަނީ މި ނިޒާމާ ގުޅޭ ކަންކަން ދިރާސާކޮށް، މިއަދު އަޅަންޖެހޭ ފިޔަވަޅުތައް ނޭޅިއްޖެނަމަ މާދަމާ ރައްޔިތުންނަށް ލިބިދާނެ ގެއްލުންތައް ފާހަގަކޮށްފައެވެ.
އެއާއެކު، މިނިސްޓަރު ވަނީ ވޭތުވެދިޔަ އަހަރު ސިއްހީ ދާއިރާއިން ހާސިލުކުރެވުނު ކާމިޔާބީތަކުގެ ތެރެއިން އެއަރ އެމްބިއުލާންސްގެ ޚިދުމަތާއި، ކޮލިޓީ ބޭހުގެ ޚިދުމަތް، އަދި ކާބޯތަކެތީގެ ރައްކާތެރިކަމުގެ ޤާނޫނަށް އަމަލުކުރަން ފެށުންފަދަ މުހިންމު ކަންތައްތައް ފާހަގަކުރައްވާފައެވެ.
