އަމާނާ ތަކާފުލްއިން ވަގުތީގޮތުން މެދުކަނޑާލާފައިވާ ސިއްހީ ދާއިރާގެ ކޭޝްލެސް ހިދުމަތް އަލުން ފަށައިފިއެވެ. އެ ކުންފުނިން ބުނާ ގޮތުގައި ކުންފުނީގެ ޕޯޓަލް މެދުވެރިކޮށް ކުރިން ފަދައިން ކޭޝްލެސްކޮށް ސިއްހީ ހިދުމަތް ލިބެން ފަށާފައިވެއެވެ. އަދި މި މުއްދަތުގައި ކަސްޓަމަރުން ދެއްވި އެއްބާރުލެއްވުމަށް ޝުކުރު އަދާކޮށްފައިވާއިރު، އިތުރު މައުލޫމާތު ބޭނުންފުޅުވާ ފަރާތްތަކަށް [email protected] އަށް މެއިލްކުރުމަށް ނުވަތަ 9540045 އަށް ވައިބަރ މެސެޖް ކުރެއްވުމަށް އެ ކުންފުނިން އެދިފައިވެއެވެ.
ކޭޝްލެސް ހިދުމަތަކީ ޑޮކްޓަރަށް ދެއްކުމަށް އަމިއްލަ ޖީބުން ފައިސާ ދައްކަންނުޖެހި، އިންޝުއަރެންސް މެދުވެރިކޮށް އެ ފައިސާ ހަމަޖެހޭ ގޮތަށް ދެވޭ ހިދުމަތެކެވެ. މި ހިދުމަތް ނުލިބޭ ހާލަތުގައި، ފުރަތަމަ އަމިއްލައަށް ފައިސާ ދެއްކުމަށްފަހު ފަހުން އެ ފައިސާ ކްލެއިމް ކުރަންޖެހެއެވެ.
އަމާނާ ތަކާފުލްއިން ކޭޝްލެސް ހިދުމަތް މެދުކަނޑާލަން ޖެހުނީ ސަރުކާރުން މިދިޔަ ހުކުރު ދުވަހު ގެނައި އުސޫލީ ބަދަލެއްގެ ސަބަބުންނެވެ. އެއީ އަމިއްލަ އިންޝުއަރެންސް ހުސްނުވަނީސް އާސަންދަ ބޭނުން ނުކުރެވޭ ގޮތަށް ގެނެވުނު ބަދަލެކެވެ. މި ބަދަލާ ގުޅިގެން އެހެން ބައެއް ޕްރައިވެޓް އިންޝުއަރެންސް ކުންފުނިތަކުންވެސް ކޭޝްލެސް ހިދުމަތް ވަގުތީގޮތުން ހުއްޓާލާފައިވީ ނަމަވެސް، ގިނަ ކުންފުނިތަކުން މިހާރު ވަނީ އަލުން މި ހިދުމަތް ދޭން ފަށާފައެވެ.
