އައިޖީއެމްއެޗުގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލައިގެ ޝަރީއަތް ލަސްވެ، ހައްގުތަކަށް ހުރަސްއެޅެމުންދާތީ، އެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލަން އޭނާގެ ފަރާތުން ކްރިމިނަލް ކޯޓުގައި މިއަދު އޮތް އަޑުއެހުމުއްގައި އެދިއްޖެއެވެ.
ލަމްހާގެ ވަކީލު އަހުމަދު ޔާމީން ވިދާޅުވެފައިވަނީ ހައި ކޯޓުން އޭނާ އަލުން ބަންދުކުރުމަށް ނިންމި ފަހުން 322 ދުވަސް ފާއިތުވެ، އަޑުއެހުންތައް ކުރިއަށްދާ ގޮތަށް ބަލާއިރު، ހެކިބަސް އެންމެ އެކަށީގެންވާ ގޮތެއްގައި ނެގެމުން ނުދާތީ ޝަރީއަތް ލަސްވެފައިވާ ކަމަށެވެ. އަދި އޭގެ ސަބަބުން ލަމްހާގެ ހައްގުތަކަށް އުނިކަން އަންނަ ކަމަށް ވިދާޅުވިއެވެ.
ދައުލަތުގެ ފަރާތުން މިއަދުގެ އަޑުއެހުމުގައި ބުނެފައިވަނީ ލަމްހާގެ ފުށުން މުޖުތަމައުއަށް އޮތް ނުރައްކާ ކުޑަވެފައި ނުވާތީއާއި، ބައެއް ހެކިވެރިންގެ ހެކިބަސް ނެގުން ލަސްވެފައިވަނީ އިދާރީ މައްސަލަތަކާ ގުޅިގެން ކަމަށްވާތީ، ހެކިބަސް ނެގުމަށް ހުރަސް އެޅިފައި ނުވާ ކަމަށް ގަބޫލުކުރާ ކަމަށެވެ.
ގާޒީ ހުސެއިން ފާއިޒް ރަޝާދުގެ ސުވާލަކަށް ޖަވާބު ދެމުން ދައުލަތުގެ ވަކީލު އައިޝަތު އަޒްލީނާ ވިދާޅުވެފައިވަނީ ބަންދުކޮށްފައި ހުރި ހުރުމަށް ބަދަލު ގެންނާނެ ތަނެއް ނެތް ކަމަށް ގަބޫލުކުރެވޭތީ، ބަންދު މުރާޖައާކުރަން ހުށަހަޅާފައި ނުވާ ކަމަށެވެ. އަދި ގޭބަންދަށް ދޫކޮށްލައިފި ނަމަވެސް މުޖުތަމައުއަށް އޮތް ނުރައްކާ ކުޑަނުވާނެ ކަމަށް ދައުލަތުން ދެކޭތީ، އެގޮތަށްވެސް ދޫކޮށްލުމަށް ދެކޮޅު ހަދާފައިވެއެވެ.
މި މައްސަލައިގައި ލަމްހާ އަކީ 2021 ވަނަ އަހަރުގެ އޮކްޓޫބަރު 19 ވަނަ ދުވަހު މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީ، އޭނާގެ ފިރިމީހާއާއި ގުޅިގެން މަރާލި ކަމަށް ތުހުމަތުކުރެވޭ މީހެކެވެ. މި މަރުގައި އެހީތެރިވެދިނުމުގެ ތުހުމަތުގައި ލަމްހާގެ މައްޗަށް ތިން ދައުވާއެއް އުފުލާފައިވާއިރު، މާވިންގެ މައްޗަށް ގަސްދުގައި މީހަކު މަރާލުމުގެ ދައުވާ އުފުލާފައިވެއެވެ.
