ރާއްޖޭގައި އެންމެ ފަހުން އުފެއްދި އެއް ޕާޓީ ކަމުގައިވާ މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނައިބު ރައީސްގެ މަގާމުން، ތިމަރަފުށި ދާއިރާގެ ކުރީގެ މެމްބަރު އަބުދުﷲ ރިޔާޒު އިސްތިއުފާ ދެއްވައިފިއެވެ.
މި ނޫހަށް މައުލޫމާތު ދެއްވަމުން އަބުދުއްﷲ ރިޔާޒު ވިދާޅުވެފައިވަނީ އެމްއެންޕީގެ ނައިބު ރައީސްގެ މަގާމުން އޭނާ އިސްތިއުފާ ދެއްވީ އަމިއްލަ ކަންކަމަށް އިތުރަށް ވަގުތު ދެއްވުމުގެ ގޮތުން ކަމުގައެވެ.
އަބުދުﷲ ރިޔާޒްއަކީ ކިނބިދޫ ދާއިރާގެ އިތުރުން ތިމަރަފުށީ ދާއިރާގެ މެމްބަރުންކަންވެސް ކުރައްވާފައިވާ ބޭފުޅެކެވެ. އޭގެކުރިން އޭނާވަނީ ކޮމިޝަނަރ އޮފް ޕޮލިސްގެ މަގާމުވެސް އަދާ ކުރައްވާފައެވެ.
އެމްއެންޕީގެ ރިޔާސީ ކެނޑިޑޭޓެއްގެ ހައިސިއްޔަތުން އެޕާޓީގެ ރައީސް ނާޒިމްވަނީ ފާއިތުވި ރިޔާސީ އިންތިޚާބުގައި ވާދަކުރައްވާފައެވެ. އެހެންނަމެވެސް އޭނާއަށް އެއިންތިޚާބުގައި އެކަށީގެންވާ ނަތީޖާއެއް ނެރެވިފައެއް ނުވެއެވެ. އެއަށްފަހު ރިޔާސީ އިންތިޚާބުގެ ދެވަނަ ބުރުގައި އެޕާޓީން ތާއީދު ކޮށްފައިވަނީ މިހާރުގެ ރައީސް މުއިއްޒުއަށެވެ.
އިލެކްޝަންސް ކޮމިޝަންސްގެ ދަފްތަރުގައި ވާގޮތުން އެޕާޓީގައި މިހާރު ތިބީ 7519 މެމްބަރުންނެވެ.
