މޯލްޑިވިއަންގެ ވައިޑް ބޮޑީ ބޯޓު މިއަހަރު ނިމުމުގެ ކުރިން ރާއްޖެ އަންނާނެކަމަށް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވެއްޖެއެވެ. އޭނާ މިހެން ވިދާޅުވީ މިއަދު ނޫސްވެރިންނާ ބައްދަލުކުރައްވާ ވާހަކަ ދައްކަވަމުންނެވެ.
މިނިސްޓަރު ވިދާޅުވި ގޮތުގައި ބޯޓުގެ ހުރިހާ މަސައްކަތެއް މިހާރު ވަނީ ނިމި، ރިފާރނިޝްމެންޓް ޕްރޮސެސް ފެށިފައެވެ. އަދި ކުރިއަށް އޮތް 6 ދުވަހުގެ ތެރޭގައި ލިވަރީ ޕެއިންޓް މަރުހަލާ ފެށޭނެ ކަމަށާއި، ޝެޑިއުލްއާ އެއްގޮތަށް މަސައްކަތްތައް ކުރިއަށްދާ ކަމަށް މިނިސްޓަރު ވިދާޅުވިއެވެ.
ރައީސްގެ ވައުދުފުޅާ އެއްގޮތަށް ޗައިނާ އަދި ޔޫރަޕްގެ ބައެއް ޑެސްޓިނޭޝަންތަކަށް ބޯޓުން ދަތުރުތައް ފެށޭނެ ނަމަވެސް، އެއްބޯޓަކުން ހުރިހާ ޑެސްޓިނޭޝަނަކަށް އެއްފަހަރާ ދަތުރުތައް ނުފެށޭނެކަން މިނިސްޓަރު ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވި ގޮތުގައި، މި ޚިދުމަތްތައް 2025 އިން ފެށިގެން ރާއްޖޭގެ ޓޫރިޒަމަށް ފައިދާކުރާނެއެވެ. އަދި ކުދި ވިޔަފާރިތަކަށް ވެސް މީގެ ފައިދާ ކުރާނެއެވެ. ބޮޑެތި ސިޓީތަކަށް ޑައިރެކްޓް ފްލައިޓްތައް އޮޕަރޭޓްކުރުމަކީ ހަމައެކަނި އެއާލައިންގެ ވިޔަފާރިއަށް އެކަންޏެއް ނޫން، އާންމު ވިޔަފާރިތަކަށާއި އިޤްތިޞާދަށް ވެސް ވަރަށް ބޮޑު ކުރިއެރުމެއް ލިބިގެންދާނެ ކަމެއް ކަމުގައި މިނިސްޓަރު ވިދާޅުވިއެވެ.
