އަމިއްލަ އިންޝުއަރެންސް ލިބެން ނެތް ހާލަތްތަކުގައި އާސަންދައިގެ ޚިދުމަތް ކުރިއެކޭ އެއްގޮތަށް މެދުނުކެނޑި ލިބޭނެކަމަށް އެންސްޕާއިން ހާމަ ކޮށްފިއެވެ. އެންސްޕާއިން މިކަން ހާމަކޮށްފައިވަނީ، އާސަންދައިގެ އައުޓްޕޭޝަންޓް ޚިދުމަތަށް ގެނެވުނު ބަދަލާ ގުޅިގެން، އަމިއްލަ އިންޝުއަރެންސް ސްކީމްތަކަށް އިސްކަންދިނުމާ ބެހޭގޮތުން ނުބައި މައުލޫމާތު ފެތުރެމުންދާތީއެވެ.
މީސްމީޑިއާގައި ބައެއް ފަރާތްތަކުން ވިދާޅުވެފައިވާ ގޮތުން، އަމިއްލަ އިންޝުއަރެންސް ސްކީމަށް އިސްކަންދޭން ފެށުމުގެ ސަބަބުން ގިނަ އަދަދެއްގެ ރައްޔިތުން ބޮޑެތި އަގުތަކެއް ޑޮކްޓަރަށް ދައްކަން ޖެހިފައިވާ ކަމަށް ބުނެފައިވެއެވެ. ނަމަވެސް އެންސްޕާއިން ވިދާޅުވެފައިވަނީ، އަމިއްލަ އިންޝުއަރެންސް ކަވަރޭޖް ނުވަތަ ޚިދުމަތް ނުލިބޭ ހާލަތްތަކުގައި އާސަންދައިގެ ޚިދުމަތް ކުރިއެކޭ އެއްގޮތަށް ލިބެން ހުންނާނެ ކަމަށެވެ.
އިންޝުއަރެންސް ކުންފުނިތަކުން ކޭޝްލެސް ޕޭމަންޓް ހުއްޓާލައި، އިންޝުއަރެންސް ޕޮލިސީން ކަވަރޭޖް ނުލިބޭ ހާލަތްތަކުގައިވެސް އާސަންދައިގެ ޚިދުމަތް އޮންނާނެއެވެ. ކޭޝްލެސް ޕޭމަންޓަކީ ސިއްހީ ޚިދުމަތްދޭ ތަންތަނުން ފައިސާ ވަގުތުން ނުދައްކާ، ހޮސްޕިޓަލާއި އިންޝުއަރެންސް ކުންފުންޏާ ދެމެދު ސީދާ މުއާމަލާތް ކުރެވޭ ނިޒާމެކެވެ. މި ނިޒާމު ހުއްޓާލުމުން، އެ ފައިސާ ދެއްކުމާއި އަނބުރާ ހޯދުމުގެ ޒިންމާ އުފުލަން ޖެހެނީ ޚިދުމަތް ހޯދާ ފަރާތުންނެވެ.
މި މައްސަލައިގައި ހަގީގަތާ ޚިލާފު މައުލޫމާތު ފެތުރެމުންދާތީ، އެންސްޕާއިން ވަނީ ކަންބޮޑުވުން ފާޅުކުކޮށްފައެވެ. އަދި ރައްޔިތުންނަށް ސައްހަ މައުލޫމާތު ހޯދުމަށް އިލްތިމާސް ކޮށްފައިވެއެވެ.
