ކުރިން ރާއްޖެ ބޮއިކޮޓް ކުރުމަށް ގޮވާލި ބޮލީވުޑްގެ މަޝްހޫރު ތަރި އަކްޝޭ ކުމާރު އިއްޔެ ރާއްޖެއަށް އަތުވެއްޖެއެވެ.
މިއީ އިންޑިއާގެ ބޮޑުވަޒީރު ނަރެންދުރަ މޯދީ ލަކްޝަދީބުގެ ފަތުރުވެރިކަން އިސްތިހާރުކުރުމާ ގުޅިގެން، ޔޫތު މިނިސްޓްރީގެ ކުރީގެ ޑެޕިއުޓީ މިނިސްޓަރުން އިންޑިއާއަށް މަލާމާތްކުރި މައްސަލައިގައި އިންޑިއާގެ ފަތުރުވެރިންނަށް ރާއްޖޭގެ ބަދަލުގައި އިންޑިއާގެ ރަށްތަކަށް ޒިޔާރަތްކުރުމަށް އަކްޝޭ ގޮވާލުމަށްފަހު އޭނާ ރާއްޖެ އައި ފުރަތަމަ ފަހަރެވެ.
އަކްޝޭގެ މި ދަތުރާ ގުޅިގެން، ވެލާނާ އިންޓަނޭޝަނަލް އެއާޕޯޓުގައި އެތަނުގެ މުވައްޒަފަކާއެކު ނަގާފައިވާ ފޮޓޯއެއް މިހާރު ދަނީ ސޯޝަލް މީޑިއާގައި ދައުރުވަމުންނެވެ. އެހެންނަމަވެސް އޭނާ ޗުއްޓީ ހޭދަކުރަމުންދާ ރިސޯޓެއް އަދި ވަނީ އެނގިފައެއް ނުވެއެވެ.
މީގެކުރިން ވެސް އަކްޝޭ ވަނީ ރާއްޖެއަށް އެކި ފަހަރު މަތިން ޒިޔާރަތްކޮށްފައެވެ. އޭގެ ތެރޭގައި 2024 އަދި 2022 ވަނަ އަހަރުގެ ނިއު އިޔާ ފާހަގަކުރުމަށް ކުރި ދަތުރުތައް ހިމެނެއެވެ. އެކްސްގައި ތިބި 46 މިލިއަން ފޮލޯވަރުންނަށް ރާއްޖެ ބޮއިކޮޓް ކުރުމަށް ގޮވާލިއިރު، އޭނާ ބުނެފައިވަނީ އިންޑިއާއާ ބެހޭގޮތުން ދެއްކި ވާހަކަތަކުން ހައިރާންވި ކަމަށާއި، ގަދަރުކުރުން އޮންނަންޖެހޭނެ ކަމަށެވެ.
މި މައްސަލައިގައި ސަރުކާރުން ވަނީ މޯދީއަށް މަލާމާތްކުރި ޑެޕިއުޓީ މިނިސްޓަރުން މަގާމުން ވަކިކޮށް، އިންޑިއާ ސަރުކާރާއެކު ގޯސްވެފައި އޮތް ގުޅުން ރަނގަޅު ކުރުމަށް ގިނަ މަސައްކަތްތަކެއް ކޮށްފައެވެ. އަދި ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ދަތުރުފުޅުގައި، ބޮލީވުޑްގެ ތަރިންނާ ބައްދަލުކުރައްވައި، ފިލްމުތައް ރާއްޖޭގައި ކުޅުމަށް މަރުހަބާ ކިޔާނެ ކަމުގެ ޔަގީންކަން ދެއްވާފައިވެއެވެ.
