ގއ. ކޫއްޑޫ އެއާޕޯޓުގެ ރަންވޭ މަރާމާތު ކުރުމަށްފަހު މިއަދުން ފެށިގެން އަނެއްކާވެސް ދަތުރުތައް ފަށައިފިއެވެ.
މޯލްޑިވިއަން އިން ބުނީ މިއަދުން ފެށިގެން ކޫއްޑުއަށް ދަތުރުތައް އަލުން ފެށިއިރު، ދުވާލަކު ދެ ދަތުރު ބާއްވާނެ ކަމަށެވެ.
ކޫއްޑުއަށް ކުރި ދަތުރުތައް މޯލްޑިވިއަން އިން މެދުކަނޑާލީ ރަންވޭގެ ހާލަތު ދަށްވެގެންނެވެ. ރަންވޭ ހަލާކުވެ ވަޅުގަނޑު ހެދި، ރަންވޭ މައްޗަށް ހިލަކޮޅުތައް އަރާފައި ހުރުމުގެ ސަބަބުން މޯލްޑިވިއަންގެ ދެ ފްލައިޓެއްގެ އިންޖީނުގައި ވެސް މައްސަލަ ޖެހުނެވެ.
ދަތުރުތައް މެދުކަނޑާލާފައި އޮތް ދުވަސްކޮޅު، ކޫއްޑޫއާ ކައިރި ރަށްތަކުގެ މީހުން މާލެއަށް ދަތުރުކުރަން ޖެހުނީ، އާރްޓީއެލް ފެރީގައި ގދ. ކާޑެއްދޫއަށް ގޮސްގެންނެވެ. ބައެއް މީހުން ލޯންޗު ހިފައިގެން ވެސް ދާން ޖެހުމުން އިތުރު ހަރަދުތަކެއް ވެސް ކުރަން ޖެހުނެވެ.
