އައްޑޫ ސިޓީއަށް ކުރައްވާ ދަތުރުފުޅެއްގައި، ޕްރޮސެކިއުޓަރ ޖެނެރަލް އައްބާސް ޝަރީފް މިއަދު އެ ސިޓީގެ ފުލުހުންގެ އިސްވެރިންނާ ބައްދަލު ކޮށްފިއެވެ.
މި ބައްދަލުވުމުގައި ސައުތު ޕޮލިސް ރީޖަން ކޮމާންޑަރު، އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝަމީމްގެ އިތުރުން އައްޑޫ ސިޓީ ޕޮލިސް ސްޓޭޝަންތަކުގެ ކޮމާންޑަރުންނާއި އިންވެސްޓިގޭޝަން އޮފިސަރުން ބައިވެރިވެވަޑައިގެންނެވިއެވެ. އަދި ޑެޕިއުޓީ ޕްރޮސިކިއުޓަރ ޖެނެރަލް އަލްއުސްތާޛު މަހުމޫދު ސަލީމް ވެސް މި ބައްދަލުވުމުގައި ބައިވެރިވެވަޑައިގެންނެވިއެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ފުލުހުން ތަހުގީގުކުރާ މައްސަލަތައް ކާމިޔާބުކަމާއެކު ޕްރޮސެކިއުޓްކުރުމަށް ދެ މުއައްސަސާ ގުޅިގެން މަސައްކަތްކުރާނެ ގޮތްތަކާއި، މިހާރު ދިމާވާ ގޮންޖެހުންތައް ދެނެގަނެ އެކަންކަމަށް ހައްލު ހޯދުމުގެ މައްސަލަތަކެވެ.
ފާހަގަކޮށްލެވޭ ކަމެއްގެ ގޮތުގައި، އައްޑޫގައި ހިންގަމުންދާ ޕީޖީ އޮފީހުގެ ގޮފި ވަނީ ދެކުނުގެ އަތޮޅުތަކަށް ޚާއްސަކޮށްގެން ޤާއިމްކުރެވިފައެވެ.
