ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ހާމަކުރެއްވި ގޮތުގައި، އަންނަ އަހަރަށް ލަފާކުރާ ދައުލަތުގެ ބަޖެޓު، އަންނަ ބުރާސްފަތި ދުވަހު ބޭއްވޭ މަޖިލީހުގެ ޖަލްސާގައި ހުށަހެޅޭނެއެވެ.
މަޖިލީހުގެ ރައީސް އަބްދުއްރަހީމް އަބްދުﷲ ނިންމަވާފައިވާ ގޮތުގައި ބަޖެޓު ހުށަހެޅުމުގެ ޖަލްސާ ބޭއްވުމަށް ހަމަޖެހިފައިވާ ވާހަކަ ނާޒިމް ވިދާޅުވީ، ޓެކްސް ބިލްތައް ދިރާސާކުރަމުންދާ މާލިއްޔަތު އަދި އިގުތިސާދީ ކޮމިޓީގެ ޖޮއިންޓް ކޮމިޓީގެ ބައްދަލުވުމުގައެވެ. އަދި އެ ކޮމިޓީގައި ދިރާސާކުރަމުންދާ ހަތަރު ޓެކްސް ބިލުގެ މަސައްކަތް މާދަމާގެ ނިޔަލަށް ނިންމުމަށް ފެނިވަޑައިގަންނަވާ ކަމަށް ނާޒިމް ވިދާޅުވުމާ ގުޅިގެން، ކޮމިޓީން ވަނީ ބިލްތަކުގެ މަސައްކަތް ނިންމުމަށް ފާސްކޮށްފައެވެ. އެގޮތުން އެއް ދުވަހުގެ ތެރޭގައި ބިލްތައް ދިރާސާކޮށް ނިންމުމަށް 16 މެންބަރުން ތާއީދުކުރެއްވިއިރު، ތިން މެންބަރުން ވަނީ އިއުތިރާޒު ކުރައްވާފައެވެ.
އަންނަ އަހަރުގެ ބަޖެޓު ހުށަހެޅުމުގެ މަސައްކަތް ސަރުކާރުން ކުރަމުންދާއިރު، މިހާރު ވަނީ 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް މަޖިލީހަށް ހުށަހަޅާފައެވެ. މި އަހަރަށް ފާސްކޮށްފައިވާ 49.8 ބިލިއަން ރުފިޔާގެ ބަޖެޓުން މިހާތަނަށް ޚަރަދުކޮށްފައިވަނީ 37.4 ބިލިއަން ރުފިޔާ ކަމަށް ފިނޭންސް މިނިސްޓްރީން ބުނެއެވެ.
މިދިޔަ ސަރުކާރުގައި، އޭރުގެ ވެރިކަންކުރާ ޕާޓީގެ އަޣުލަބިއްޔަތު އޮތް މަޖިލީހުން ފާސްކުރި ބަޖެޓާ ގުޅޭ ގޮތުން މި ސަރުކާރުން ވަނީ ގިނަ ޝަކުވާތަކެއް ކޮށްފައެވެ. ޚާއްސަކޮށް، މި ސަރުކާރުގެ މުހިންމު މަޝްރޫއުތަކަށް ފައިސާ ކަނޑަނާޅައި ބަޖެޓު ފާސްކުރި ކަމުގެ ޝަކުވާތައް ކޮށްފައިވެއެވެ.
