އިސްރާއިލުން އީރާނަށް ދިން ވައިގެ ހަމަލާތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
މި ހަމަލާތަކަކީ ބައިނަލްއަގުވާމީ ގާނޫނުތަކާ ޚިލާފަށް ދެވުނު ހަމަލާތަކެއް ކަމަށް ފޮރިން މިނިސްޓްރީން ނެރުނު ބަޔާނުގައި ފާހަގަކޮށްފައިވެއެވެ. އަދި އިސްރާއިލުން ސަރަހައްދީ ގައުމުތަކަށް ދެމުންދާ ހަމަލާތައް ހުއްޓާލުމަށާއި ބައިނަލްއަގުވާމީ ގާނޫނުތަކަށް އިހްތިރާމްކުރުމަށް ގޮވާލައިފައިވެއެވެ. މީގެއިތުރުން ސަރަހައްދީ ހަމަޖެހުން ގާއިމްކުރުމަށް މަސައްކަތްކުރުމަށް ބައިނަލްއަގުވާމީ މުޖުތަމަޢުއަށްވެސް ސަރުކާރުން ވަނީ ގޮވާލައިފައެވެ.
އިސްރާއިލުން ރޭ ފަތިހު ފަށައިގަތް ހަމަލާތަކުގައި އީރާނުގެ 20 އަސްކަރީ ތަނަކަށް ފައިޓަރ ޖެޓުންނާއި މިސައިލުން ވަރުގަދަ ހަމަލާތަކެއް ދިނެވެ. މި ހަމަލާތައް ދެވުނީ ތިން ފަހަރެއްގެ މަތިންނެވެ. ފުރަތަމަ ހަމަލާއާއި ދެވަނަ ހަމަލާއާ ދެމެދު ވިއްސަކަށް މިނެޓު ހޭދަވިއިރު، ދެވަނަ އަދި ތިންވަނަ ހަމަލާއާ ދެމެދު ބައިގަޑިއިރު ވޭތުވިއެވެ. މި ހަމަލާ އަމާޒުކުރެވުނު ތަންތަނަކީ ކުރިންސުރެ ހަމަލާދޭން ކަނޑައަޅާފައިވާ އަސްކަރީ މަރުކަޒުތަކެއް ކަމަށް އިސްރާއިލުން ބުނެފައިވެއެވެ.
އީރާނުން ކުރިން ހާމަކޮށްފައިވާ ގޮތުގައި، އިސްރާއިލުގެ ހަމަލާތަކުން ބޮޑު ގެއްލުމެއް ނުލިބޭނަމަ، ސީދާ ރައްދެއް ނުދިނުމަކީ އެކަށީގެންވާ ކަމެކެވެ. އެއީ ސަރަހައްދީ ހަނގުރާމައަކަށް ދާން އީރާނުން ބޭނުންނުވާތީއެވެ. އެހެންނަމަވެސް، މާބޮޑު ގެއްލުމެއް ލިބިއްޖެނަމަ، ކުރިން އިސްރާއިލަށް ދިން ހަމަލާތަކަށްވުރެ ގަދަފަދަ ހަމަލާތަކެއް ދޭނެކަމަށް އީރާނުން ބުނެފައިވެއެވެ.
ޚާއްސަކޮށް އީރާނުގެ ތެލާއި ގޭހުގެ މަރުކަޒުތަކާއި ނިއުކްލިއަރ މަރުކަޒުތަކަށް ހަމަލާދީފިނަމަ، އިސްރާއިލުގެ ނިއުކްލިއަރ މަރުކަޒު ބިމާ ހަމަކުރެވޭ ވަރުގެ ހަމަލާތަކެއް ދޭނެކަމަށް އިރާނުން ބުނެފައި ވެއެވެ.
