ޔަހްޔާ ސިންވާރު ޝަހީދުވުމާ ގުޅިގެން އަދާލަތު ޕާޓީން ތައުޒިޔާ ފާޅުކޮށްފިއެވެ.
ހަމާސްގެ ލީޑަރު ޝަހީދުވީ ބުރާސްފަތި ދުވަހުއެވެ. އަދާލަތު ޕާޓީން ނެރުނު ބަޔާނުގައި ބުނެފައިވަނީ، ޣައްޒާގެ ބިންތައް ފޭރިގަތުމަށް އަރައިގަތް ސިފައިންނާ ކުރިމަތިލައި، ފަސްޖެހުމެއްނެތި ޔަހްޔާ ހަމަލާ ބަދަލުކުރަމުން ދިޔަ ކަމަށެވެ. އެންމެ ފަހު ވަގުތު ވެސް އަނިޔާވެރިންނަށް ހަމަލާދިނުމުގައި ޔަހްޔާގެ ސާބިތުކަން ފާހަގަކޮށްފައިވެއެވެ.
އަދާލަތު ޕާޓީން ވަނީ، 1948 އިން ފެށިގެން އަލްމަސްޖިދުލް އަގްޞާއާއި ފަލަސްތީނުގެ ބިންތައް ހިސޯރުކޮށް، ފަލަސްތީނު ރައްޔިތުންގެ ނަސްލު ނައްތާލުމަށް ޔަހޫދީން ހިންގަމުންދާ ލާއިންސާނީ ޖަރީމާތަކާ ދެކޮޅަށް ކުރިއަށްދާ ޖިހާދު ބިނާވެފައިވަނީ ވަކި ފަރުދެއްގެ މައްޗަކަށް ނޫން ކަމަށް ބުނެފައެވެ. އަދި މި ޖިހާދަކީ އަމާޒުތަކަށް ވާސިލުވަންދެން ކުރިއަށްދާނެ ކަމެއްކަމަށްވެސް ބަޔާންކޮށްފައިވެއެވެ.
މާތްاللهގެ ވާގިފުޅާއެކު އަލްމަސްޖިދުލް އަގްޞާ މިނިވަންކުރުމަށާއި ފަލަސްތީނުގެ ރައްޔިތުންގެ ހައްގުތައް ހޯދައިދިނުމަށް ވަކާލާތުކުރުމާއި ކުރެވެވެން ހުރި ކޮންމެ މަސައްކަތެއް ކުރުމުގައި މި ޕާޓީން ދެމިއޮންނާނަމެވެ.
އަދާލަތު ޕާޓީގެ ބަޔާނުގައި ވިދާޅުވެފައި ވެއެވެ.
އިސްރާއީލަކީ މުޅި އިންސާނިއްޔަތަށް ހުރި ނުރައްކަލެއްކަމަށް ފާހަގަކުރަމުން، އަނިޔާވެރިކަން ނިމުމަކަށް ގެނައުމަށް އަދާލަތު ޕާޓީން ގޮވާލާފައިވެއެވެ. އަދި އިސްރާއީލުގެ ލާއިންސާނީ ޢަމަލުތަކަށް ބަލައި، ފަލަސްތީނުގެ ރައްޔިތުންނަށާއި އިންސާނިއްޔަތަށް އިންސާފު ހޯދައިދިނުމަށްވެސް ގޮވާލާފައިވެއެވެ.
އަދާލަތު ޕާޓީން އިތުރަށް ބުނެފައިވަނީ، އަލްމަސްޖިދުލް އަގްޞާ މިނިވަންކުރުމަށާއި ފަލަސްތީނު ރައްޔިތުންގެ ޙައްޤުތައް ހޯދައިދިނުމަށް ވަކާލާތުކުރުމާއި، ކުރެވެންހުރި ހުރިހާ މަސައްކަތެއް ކުރުމުގައި އެ ޕާޓީން ދެމިއޮންނާނެ ކަމަށެވެ.
ޔަހްޔާ ހަމާސްގެ ލީޑަރުކަމަށް އައްޔަންކުރެވުނީ އެ ޖަމާޢަތުގެ އެންމެ އިސް ލީޑަރު އިސްމާޢީލް ހަނިއްޔާ ޖުލައި މަހު ޝަހީދުވުމަށްފަހުގައެވެ.
