އަންނަ އަހަރު ބޯންމެރޯ ޓްރާންސްޕްލާންޓް ހެދުމަށް ފޮނުވުމުގެ ކުރިން ތެލެސީމިއާ ބަލި ކުދިން ސްކްރީންކުރަން ފަށައިފިއެވެ.
ތެލެސީމިއާ މާސްޓަރ ޕްލޭން އިފްތިތާހުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ، ބޯންމެރޯ ޓްރާންސްޕްލާންޓްގެ ފުރުސަތު މިއަހަރު އަލުން ފެށިގެން އައިސް، މިހާތަނަށް 14 ކުދިން އެފަރުވާ ހޯދުމަށް ރާއްޖެއިން ބޭރަށް ފޮނުވިފައިވާ ކަމަށެވެ. އޭގެއިތުރުން، ވޭތުވެދިޔަ 10 މަސްދުވަހުގެ ތެރޭގައި ތެލެސީމިއާގެ ހާލަތު ރަނގަޅުކުރުމަށް ސަރުކާރުން ގިނަގުނަ މަސައްކަތްތަކެއް ކުރިއަށް ގެންގޮސްފައިވާ ކަމަށް މިނިސްޓަރު ފާހަގަކުރެއްވިއެވެ.
މީގެ ތެރޭގައި ތެލެސީމިއާ ކުދިން ސްކްރީންކުރުމާއި، ސްކޫލު ކުދިން މިބައްޔަށް ހޭލުންތެރިކުރުވުމުގެ ޕްރޮގްރާމްތައް ހިންގުމާއި، އަދި 4 ތަނެއްގައި ބްލަޑް ބޭންކް ޤާއިމުކުރުން ހިމެނެއެވެ. ސަރުކާރުގެ މަޤްޞަދަކީ ރާއްޖޭގެ ހުރިހާ ތެލެސީމިއާ ކުދިންނަށްވެސް ހިލޭ އެހީގެ ދަށުން ބޯންމެރޯ ޓްރާންސްޕްލާންޓް ކުރެވޭނެ މަގު ފަހިކޮށްދިނުމެވެ. މިގޮތުން ކޮންމެ އަހަރަކުވެސް ވަކި އަދަދެއްގެ ކުދިންނަށް މިފުރުސަތު ފަހިކޮށްދިނުމަށް ވަނީ ރޭވިފައެވެ.
ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދާ އެއްގޮތަށް، ހުޅުމާލޭގައި ތަރައްޤީކުރެވޭ ތެލެސީމިއާ ހޮސްޕިޓަލުގައި ބޯންމެރޯ ޓްރާންސްޕްލާންޓް ހެދޭނެ އިންތިޒާމު ހަމަޖެހިގެންދާނެ ކަމަށް ހެލްތު މިނިސްޓްރީން މަޢުލޫމާތު ދީފައިވެއެވެ. މިކަމާ ގުޅިގެން، ތެލެސީމިއާ އެންޑް ހީމޮގްލޮބިނޯޕަތީސް ހޮސްޕިޓަލް އެޅުމަށް މެލޭޝިއާގެ ކުންފުންޏަކާއެކު އެއްބަސްވުމެއްގައި ސޮއިކުރެވިފައިވެއެވެ.
މިވަގުތު އާއިލާގެ ތެރެއިން ބޯންމެރޯ ޑޯނަރެއް ލިބި، ޓްރާންސްޕްލާންޓަށް ޝަރުޠު ހަމަވާ 40 ކުދިން ލިސްޓުކުރެވިފައިވާ ކަމަށް ހެލްތު މިނިސްޓްރީން ހާމަކޮށްފައިވެއެވެ. ރާއްޖޭގައި ތެލެސީމިއާ ބަލިމީހުންގެ ގޮތުގައި ޖުމްލަ 943 މީހުން ދަފްތަރުކުރެވިފައިވާއިރު، މިވަގުތު ދުނިޔޭގައި ތިބީ 655 ތެލެސީމިއާ ބަލިމީހުންނާއި ކުދިންނެވެ.
ތެލެސީމިއާ ބަލިމީހުންނަކީ އެމީހުންގެ ހަށިގަނޑުގައި ދަގަނޑުގެ މިންވަރު ދަށްކުރުމަށް ދާއިމީ ފަރުވާ ބޭނުންވާ ބައެއް ކަމަށްވާއިރު، މިބައްޔަށް އޮތް ދާއިމީ ހައްލަކީ ބޯންމެރޯ ޓްރާންސްޕްލާންޓް ހެދުމެވެ.
