ރާއްޖޭގައި އޯޝަނިކް ވައިޓް ޓިޕް ޝާކް ހިމާޔަތްކުރުމަށް މިނިސްޓްރީން ހުށަހަޅާފައިވާ ޕްރޮޕޯސަލް ކާމިޔާބުވެފައިވާ ކަމުގައި އެންވާރަމަންޓް މިނިސްޓަރު ތޯރިގް އިބްރާހީމް ވިދާޅުވެއްޖެއެވެ.
އިއްޔެ ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި މިނިސްޓަރު ތޯރިގް ވިދާޅުވިގޮތުގައި، ސައިޓީސް (ކޮންވެންޝަން އޮން އިންޓަނޭޝަނަލް ޓްރޭޑް އިން އެންޑޭންޖާޑް ސްޕީޝީޒް އޮފް ވައިލްޑް ފައުނާ އެންޑް ފްލޯރާ) އަށް އޯޝަނިކް ވައިޓްޓިޕް ޝާކް ހިމާޔަތްކުރުމަށް ހުށަހެޅި ޕްރޮޕޯސަލް މިހާރު ވަނީ ކާމިޔާބުވެފައެވެ. އަދި ސައިޓީސްއިން ބާއްވާ ދެން އަންނަ ބޮޑު ބައްދަލުވުމުގައި މިކަމާ ގުޅޭ އިތުރު މަސައްކަތްތައް ކުރިއަށްދާނެ ކަމަށް އޭނާ ވިދާޅުވިއެވެ.
ރާއްޖެއިން 2013 ވަނަ އަހަރު ބައިވެރިވެފައިވާ ސައިޓީސް މުއާހަދާގެ ޖަދުވަލުތަކުގައި ލިސްޓުކޮށްފައިވާ ދިރުންތަކާއި ތަކެތި ރާއްޖެއަށް އެތެރެކޮށް ބޭރުކުރެވޭނީ މުއާހަދާގެ ދަށުން ކަނޑައެޅިފައިވާ ހުއްދަތަކާ އެކުގައެވެ. ރާއްޖޭގައި އޯޝަނިކް ވައިޓް ޓިޕް ޝާކް އުޅޭކަމަށް ފާހަގަކުރެވިފައިވަނީ ހަމައެކަނި ފުވައްމުލަކުގައެވެ. އާންމުކޮށް 92 ކިލޯގެ ބަރުދަނަށް ބޮޑުވާ މި ޝާކު އުޅެނީ ހޫނު ކަނޑުތަކުގައެވެ.
މީގެ އިތުރުން، އެންވާރަމަންޓް މިނިސްޓްރީން ވަނީ ފަހަކަށްއައިސް ތިމާވެށީގެ ގާނޫނުގެ ދަށުން ވޭލް ޝާކް ހިމާޔަތްކޮށް، އެ ޝާކާ ގުޅޭ ގައިޑްލައިންތައްވެސް ޝާއިއުކޮށްފައެވެ.
