ގާޒާގައި ތިބި އިސްރާއީލު ސިފައިން 3 ހަނގުރާމަވެރިއަކު މަރާލައިފައިވާ ކަމަށާއި، އޭގެ ތެރެއިން އެކަކަކީ ހަމާސްގެ ލީޑަރ ޔަހްޔާ ސިންވާރު ކަމުގައި ވެދާނެކަމަށް ބެލެވޭކަމަށް އިސްރާއީލުގެ ސިފައިންގެ ބަޔާނެއްގައި މީގެ ދެތިން ގަޑިއިރު ކުރިން ބުނެފިއެވެ.
މިހާތަނަށް ހަމާސްއިން މިކަމާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ. އަދި އެ ޖަމާޢަތުގެ ލީޑަރު މަރާލެވުނު ކަން ކަށަވަރުކޮށްދޭ އެއްވެސް ބަޔާނެއް އިސްރާއީލު ސިފައިން ނެރެފައެއް ނުވެއެވެ.
އިސްރާއީލީ މީޑިއާތަކުން ރިޕޯޓުކުރާ ގޮތުގައި، އެ ހަނގުރާމަވެރިޔާގެ ހަށިގަނޑު ޖެރޫސަލަމަށް ގެންގޮސް، އޭނާގެ ކާކުކަން ޔަގީންކުރުމަށް ޑީއެންއޭ ޓެސްޓު މިހާރު ދަނީ ހަދަމުންނެވެ.
ފާއިތުވި އޯގަސްޓް މަހު، ހަމާސްއިން އޭގެ ގާޒާގެ ލީޑަރު ޔަހްޔާ ސިންވާރު އައްޔަން ކުރީ، އެޖަމާއަތުގެ ލީޑަރު އިސްމާޢީލް ހަނިއްޔާގެ އިސްރާއީލުގެ ހަމަލާއެއްގައި، އިރާނުގެ ވެރިރަށް ތެހެރާންގައި އަވަހާރައަށްފަހުއެވެ. އެހާތަނުން ޔަހްޔާ ސިންވާރު އައްޔަން ކުރެވުނީ ހަމާސް ޖަމާއަތުގެ ޕޮލިޓިކަލް ޗީފް-އެޓް-ލާޖްގެ މަގާމަށެވެ.
ގާޒާގައި އިޒްރާއީލާ ދެކޮޅަށް ހަނގުރާމަ ކުރަމުންދާ ޔަހްޔާ ސިންވާރަކީ އެއަށްފަހު އިސްރާއީލުގެ އެންމެ ބޮޑު ދުޝްމަންއެވެ.
މިއަހަރުގެ މޭމްހުގެ ފަހުން ޔަހްޔާ ސިންވާރު ވަނީ ގާޒާގައި ހަމާސް ހަރަކާތުގެ ލީޑަރަކަށް އައްޔަން ކޮށްފައެވެ. އަދި އިސްރާއީލު ސިފައިންނާ ދެކޮޅަށް ހިންގި ގިނަ އަސްކަރީ ހަރަކާތްތަކާއި އޮޕަރޭޝަންތައް ޒިންމާވެސް ޔަހްޔާ ސިންވާރު އުފުލާފައި ވެއެވެ.
ގާޒާގެ މީހުން ދެކޭގޮތުގައި ސިންވާރަކީ ފަލަސްތީނު ރައްޔިތުން އިސްރާއީލާ ދެކޮޅަށް ކުރަމުންދާ ޖިހާދުގައި ވަރަށް ބޮޑު ރަމްޒީ މަގާމެއް އޮތް މީހެކެވެ. އަދި އޭނާ މަރާލެވުން އެއީ ޣައްޒާގައި ތިބި އެންމެންނަށް ވަރަށް ބޮޑު މާޔޫސްކަމެއް އަންނާނެ ކަމެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.
