މޯލްޑިވްސް ސްޓޭޓް ޝިޕިންގ (އެމްއެސްއެސް) އާއި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އާ ދެމެދު މަހާއި މަހުގެ އުފެއްދުންތައް އެކްސްޕޯޓް ކުރުމާ ގުޅޭ މުހިންމު އެއްބަސްވުމެއްގައި މިއަދު ސޮއި ކޮށްފިއެވެ.
މި އެއްބަސްވުމުގައި އެމްއެސްއެސްގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ އަޙްމަދު ޝަރީފްއެވެ. މިފްކޯގެ ފަރާތުން ސޮއިކުރެއްވީ ކުންފުނި ހިންގުމާ ހަވާލުވެހުންނެވި ސީއެފްއޯ އިލްޔާސް ޙަނީފެވެ.
މި އެއްބަސްވުމުގެ ދަށުން، އެމްއެސްއެސްއިން މިފްކޯއަށް ފޯރުކޮށްދޭނީ މަސް އެކްސްޕޯޓް ކުރުމަށް ބޭނުންވާ އެންމެހައި ލޮޖިސްޓިކްސް ޚިދުމަތްތަކެވެ. މިގޮތުން، ރާއްޖޭގެ އެކި ކަންކޮޅުތަކުގައި ހުރި މިފްކޯގެ ފެސިލިޓީތަކުން އެމްއެސްއެސްގެ ކޮންޓެއިނަރުތަކަށް މިފްކޯގެ އުފެއްދުންތައް ލޯޑުކޮށް، "އެމްއެސްއެސް އޯޕަލް" މެދުވެރިކޮށް މާލެ ގެނައުމަށްފަހު، އެމްއެސްއެސްގެ ފީޑަރ ބޯޓުތަކުން މި އުފެއްދުންތައް ބޭރު ޤައުމުތަކަށް ފޯރުކޮށްދެވޭނެއެވެ.
މިފްކޯއިން ފާހަގަކުރާ ގޮތުގައި، މި އެއްބަސްވުމުގެ ސަބަބުން އެމްއެސްއެސް މެދުވެރިކޮށް ދުނިޔޭގެ ކޮންމެ ހިސާބަކަށްވެސް މަސް އެކްސްޕޯޓް ކުރުމުގެ ފުރުސަތު ފަހިވެގެންދާނެއެވެ. ކުރީގައި މިފްކޯއިން މަސް އެކްސްޕޯޓް ކުރަމުން އައީ ސަޕްލައި ދޯނިފަހަރުގައި ޖަނަރޭޓަރ ސެޓް ގުޅައި، ރީފަރ ކޮންޓެއިނަރު ލޯޑު ކޮށްގެން މާލެ ގެނެސް ނުވަތަ ރީފަރ އުޅަނދުފަހަރަށް ބަލްކްކޮށް މަސް ލޯޑުކޮށްގެންނެވެ.
ނަމަވެސް، މި އައު އެއްބަސްވުމާއެކު މަސް އެކްސްޕޯޓް ކުރުމުގެ ޚަރަދު ކުޑަވެ، މިފްކޯގެ ސްޓޯރޭޖް ދަތިތަކަށް ޙައްލު ލިބި، އިތުރު މާކެޓްތަކަށް ފަސޭހަކަމާއެކު ވާސިލްވުމުގެ ފުރުސަތު ހުޅުވިގެންދާނެ ކަމަށް މިފްކޯއިން ބުނެފައިވެއެވެ.
