ރާއްޖޭގައި މިހާރު ކުރަމުންދާ ވިއްސާރައިގެ ސަބަބުން މާލެ ސަރަހައްދުގައި ވައި ބާރުވެފައިވާތީ، ސިނަމާލެ ބްރިޖާއި ހައިވޭއިން ދަތުރުކުރާ ފަރާތްތަކުން ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
ނިމިދިޔަ ހަފުތާއިން ފެށިގެން ރާއްޖޭގެ މޫސުން ގޯސްވެފައިވާ ކަމަށާއި، މޫސުމާބެހޭ ޤައުމީ އިދާރާއިން ވަނީ އެކި އެލަރޓްތައް ނެރެފައެވެ. ޚާއްޞަކޮށް ވައި ގަދަވެ ކަނޑުތައް ގަދަވާނެތީ، އެކަމަށް ޚާއްޞަ ސަމާލުކަމެއް ދިނުމަށް ކަމާ ގުޅުންހުރި ފަރާތްތަކުން އެދިފައިވެއެވެ.
މޫސުމާބެހޭ ޤައުމީ އިދާރާއިން ލަފާކޮށްފައިވާ ގޮތުގައި، ރާއްޖޭގެ އުތުރާއި މެދުތެރޭގެ އަތޮޅުތަކަށް ގަޑިއަކު 17 މޭލާއި 27 މޭލާ ދެމެދުގެ ބާރުމިނުގައި ވައިޖެހޭނެއެވެ. އަދި ވިލާގަނޑުގައި ގަޑިއަކު 45 މޭލާއި 55 މޭލާ ދެމެދުގެ ބާރުމިނަށް ވައި ގަދަވުން އެކަށީގެންވާ ކަމަށްވެސް އެ އިދާރާއިން ލަފާކޮށްފައިވެއެވެ.
މި ހާލަތާ ގުޅިގެން ދިވެހި ފުލުހުންގެ ޚިދުމަތުން ސޯޝަލް މީޑިއާގައި ޕޯސްޓެއް ކުރައްވައި، ބްރިޖާއި ހައިވޭއިން ދަތުރުކުރާ ފަރާތްތަކުން ސަމާލުވުމަށް އިލްތިމާސްކުރައްވާފައިވެއެވެ. މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށްވުމާއެކު، ސިނަމާލެ ބްރިޖާއި ހައިވޭއިން ދަތުރުކުރާއިރު އަމިއްލަ ސަލާމަތާއި އަނެކުންގެ ރައްކާތެރިކަމަށް ބަލައިގެން އުޅަނދު ދުއްވުމަށް ފުލުހުން އެދިފައިވެއެވެ.
އިތުރުން، ސައިކަލު ދުއްވާއިރު ކުޑަނަގައިގެން ނުދުއްވުމަށާއި، ފަސޭހައިން ހަލާކުވެ ވަޔާދާފަދަ ވާރޭ ކޯޓު ބޭނުންނުކުރުމަށް ފުލުހުން އިލްތިމާސްކޮށްފައިވެއެވެ. ހަމައެހެންމެ، ހެލްމެޓު ވެސް ވަޔާ ނުދާނެހެން ރައްކާތެރިކޮށް އެޅުމަށާއި، އުޅަނދުތަކުގެ ލައިޓުތައް ދިއްލޭތޯ ބަލައި، ސަލާމަތާއި ރައްކާތެރިކަން ކަށަވަރުކޮށްގެން އުޅަނދުތައް ދުއްވުމަށް ދިވެހި ފުލުހުންގެ ޚިދުމަތުން އެދިފައިވެއެވެ.
މޫސުމާބެހޭ ޤައުމީ އިދާރާއިން ލަފާކުރާ ގޮތުގައި ކުރިއަށް އޮތް ތިން ދުވަހުވެސް ރާއްޖޭގެ އެކި ހިސާބުތަކަށް ވިއްސާރަކުރާނެއެވެ. އަދި ކަނޑުތައް ވެސް ގަދަވާނެ ކަމަށް ލަފާކޮށްފައިވާއިރު، ކަނޑުދަތުރުކުރާ ފަރާތްތަކުން ވެސް މޫސުމަށް ސަމާލުވުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ.
