މާލޭގައި ވަގުތީ ފެން ހިންދާ ނިޒާމު ޤާއިމުކުރުމާ ގުޅިގެން ފެން ހިންދުމުގެ މަސައްކަތް ފަސޭހަވެ އަވަސްވެފައިވާ ކަމަށް އެމްއެންޑީއެފް ފަޔަރ އެންޑް ރެސްކިއު ސަރވިސަސްއިން ބުނެފިއެވެ. މިއަހަރުގެ މެއި މަހުގެ 9 ވަނަ ދުވަހު ފެށުނު މި މަސައްކަތަކީ، ވިއްސާރަ މޫސުމުގައި މާލޭގެ މަގުތަކުގައި ފެން ބޮޑުވާ މައްސަލައަށް ވަގުތީ ޙައްލެއް ހޯދުމަށް ކުރެވޭ މަސައްކަތެކެވެ.
މާލޭގެ މަގުތައް ކުރީގައި ހެދިފައިވާ ގޮތުން، ވާރޭވެހޭ ދުވަސްވަރު ފަސޭހައިން ފެންބޮޑުވެ، ގެތަކާއި މުހިއްމު ޚިދުމަތްދޭ މަރުކަޒުތަކަށާއި ވިޔަފާރިތަކަށް ގެއްލުން ލިބެމުން ދިޔައެވެ. ނަމަވެސް މިހާރު ޤާއިމުކުރެވިފައިވާ ވަގުތީ ފެން ހިންދާ ނިޒާމުގެ ސަބަބުން، ކުރިން އެންމެ ބޮޑަށް ފެން ބޮޑުވާ ސަރަހައްދުތަކުގައި ވެސް ފެން ބޮޑުވުމުގެ މައްސަލަ ވަނީ ވަރަށް ބޮޑަށް ކުޑަވެފައެވެ.
އައިޖީއެމްއެޗް ސަރަހައްދާއި، ވިލިމާލެ ފެރީ ޓާމިނަލް ސަރަހައްދު އަދި ވެސްޓް ޕާކު ސަރަހައްދަކީ ކުރިން އެންމެ ބޮޑަށް ފެން ބޮޑުވާ ސަރަހައްދުތަކެވެ. ނަމަވެސް މިހާރު މި ސަރަހައްދުތަކުގައި ވަގުތީ ފެން ހިންދާ ނިޒާމު ޤާއިމުކުރެވި، ފެން ބޮޑުވުމުގެ މައްސަލަ ވަނީ ވަރަށް ބޮޑަށް ޙައްލުވެފައެވެ.
އެމްއެންޑީއެފް މާލޭ ފަޔަރ ސްޓޭޝަންގެ ހެޑް ލެފްޓިނެންޓް އަޙްމަދު ފިރުޝާން ވިދާޅުވި ގޮތުގައި، މި އައު ނިޒާމުގެ ސަބަބުން ވަރަށް ކުޑަ ވަގުތުކޮޅެއްގެ ތެރޭގައި ގިނަ އަދަދެއްގެ ފެން ބޭރުކުރެވޭ ކަމަށާއި، ނިޒާމު ފުރިހަމައަށް ޤާއިމުވުމުން ގާތްގަނޑަކަށް އެއް ގަޑިއިރުގެ ތެރޭގައި މުޅި މާލޭގެ ފެން ހިއްކާލެވޭނެ ކަމަށް ލަފާކުރެވެއެވެ.
މި ވަގުތީ ނިޒާމުގެ ސަބަބުން ލިބޭ ފަސޭހަ ޢާންމުންވެސް ވަނީ ފާހަގަކޮށްފައެވެ. ކުރިން ކުޑަ ވާރޭކޮޅަކުން ވެސް ފެން ބޮޑުވާ ސަރަހައްދުތަކުގައި މިހާރު ފެން ބޮޑުނުވާކަން އާންމުން ފާހަގަކުރެއެވެ. ޚާއްޞަކޮށް އައިޖީއެމްއެޗް ސަރަހައްދުގައި ފެން ހިންދިފައިވުމަކީ ރައްޔިތުންނަށް ލިބޭ ވަރަށް ބޮޑު ފަސޭހައެއް ކަމަށް ބައެއް ރައްޔިތުން ބުނެފައިވެއެވެ.
މި މަސައްކަތް ކުރިއަށް ގެންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންގެވުމުގެ މަތިން، ދިފާޢީ ވުޒާރާގެ އިސްނެގުމުގެ ދަށުން، ޤައުމީ ދިފާޢީ ބާރާއި ގުޅިގެން، އިމާރާތްކުރުމާއި ބިނާވެށްޓާބެހޭ ވުޒާރާގެ ފަންނީ އެހީތެރިކަމާއެކު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިންނެވެ.
އަދި ކުރިއަށް އޮތް ތަނުގައި، ޗައިނާ ސަރުކާރުގެ ހިލޭ އެހީގެ ދަށުން މާލޭގެ ހުރިހާ މަގެއް ޒަމާނީ ފެންވަރަށް ތަރައްޤީކުރެވުމާއެކު، މާލޭގެ މަގުތަކުގައި ފެން ބޮޑުވާ މައްސަލައަށް ދާއިމީ ޙައްލެއް އަންނާނެކަމަށް ސަރުކާރުން އުންމީދުކުރެއެވެ.
