ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އާދިލް ޖަލީލްގެ ދެ އެޕާޓްމަންޓެއް ފުލުހުންނާއި ހަވާލު ކުރުމަށް ހުޅުމާލެ މެޖިސްޓްރޭޓް ކޯޓުން ނެރުނު އަމުރެއް ހައިކޯޓުގައި އޭނާ އިސްތިއުނާފު ކޮށްފިއެވެ.
މި އަމުރަކީ ބައްސާމް އަމީން އެވެނިއު އިން ގަތް ދެ އެޕާޓްމަންޓް ފުލުހުންނާ ހަވާލުކުރުމަށް ކުރި އަމުރެކެވެ. އަމުރުގައިވާ ގޮތުން މި މަހުގެ ހަވަނަ ދުވަހުގެ ކުރިން އެޕާޓްމަންޓުތައް ހަވާލުކުރަންޖެހުނު ނަމަވެސް، ބައްސާމް އެ އެޕާޓްމަންޓުތައް ފުލުހުންނާ ހަވާލުކުރީ މި މަހުގެ އަށްވަނަ ދުވަހުއެވެ.
ހައިކޯޓުގެ ރަޖިސްޓްރީގެ މަޢުލޫމާތުން ދައްކާ ގޮތުގައި، ހުޅުމާލެ މެޖިސްޓްރޭޓް ކޯޓުގެ އަމުރު އިސްތިއުނާފު ކުރުމަށް ބައްސާމްގެ ފަރާތުން ހުށަހެޅި މައްސަލަ މިހާރު އޮތީ "ހުށަހެޅިފައި" މަރުހަލާގައެވެ. އަދި މި މައްސަލަ ބަލައިގަތުމާމެދު ހައިކޯޓުން ވަކި ގޮތެއް ނިންމާފައެއް ނުވެއެވެ.
ފުލުހުންގެ ތަޙްޤީޤަށް ހާމަވެފައިވާ ގޮތުގައި، ބައްސާމް މި އެޕާޓްމަންޓުތައް ގަތުމަށް ބޭނުންކޮށްފައިވަނީ ކޮވިޑް-19 އާ ގުޅިގެން ފުޓްބޯޅަ ކްލަބުތަކަށް ދިމާވި މާލީ ދަތިތަކަށް އެހީތެރިވުމުގެ ގޮތުން ފީފާ އިން ހޯދި 1.9 މިލިއަން ޑޮލަރުގެ ލޯނެވެ.
މި މައްސަލައާ ގުޅިގެން ބައްސާމްގެ އިތުރުން އިތުރު ދެ ފަރުދަކާއި އެއް ކުންފުންޏެއްގެ މައްޗަށް ދަޢުވާކުރުމަށް ފުލުހުން ވަނީ ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައެވެ. މި ފަރާތްތަކުގެ މައްޗަށް ތުހުމަތުކުރެވެނީ އޮޅުވާލުމާއި މަނީ ލޯންޑްރިންގ އަދި ހިޔާނާތުގެ ކުށެވެ.
