ހައިވޭގައި ދުއްވަމުންދިޔަ ސައިކަލެއްގައި އިން ކުޑަކުއްޖަކަށް ސައިކަލްގެ ކޮންޓްރޯލް ދޫކޮށްލައިގެން އިން މައްސަލައެއް ފުލުހުން ތަޙުޤީޤު ކުރަން ފަށައިފިއެވެ. މި ހާދިސާ ހިނގާފައިވަނީ ސިނަމާލެ ބްރިޖު ހައިވޭގައެވެ. އެ މަންޒަރު ދައްކުވައިދޭ ވީޑިއޯއެއް ސޯޝަލް މީޑިއާގައި ވަނީ ފެތުރިފައެވެ.
ވީޑިއޯގައި ފެންނަ ގޮތުގައި، ސައިކަލްގައި އިން މީހާ ވަނީ އޭނާގެ ކުރިމަތީގައި އިން ކުއްޖާއަށް ސައިކަލް ކޮންޓްރޯލް ކުރުމުގެ ފުރުޞަތު ދީފައެވެ. ބަލައިލުމަށް އެ ކުއްޖާގެ އުމުރަކީ ފަސް ނުވަތަ ހަ އަހަރު ކަމަށް ލަފާކުރެވެއެވެ. ސައިކަލް ދުވަމުންދަނިކޮށް، އެ މީހާ ވަނީ އޭނާގެ ކަނާތް އަތް ފައިމަތީގައި ބާއްވާލައި، ހުންގާނު ކޮންޓްރޯލް ކުއްޖާއަށް ދޫކޮށްލާފައެވެ. އެހެންނަމަވެސް، ވަކި ހިސާބަކުން އޭނާ އަލުން ހުންގާނު ހިފާތަންވެސް ވީޑިއޯއިން ފެންނަން އެބަހުއްޓެވެ.
މި ހާދިސާގެ ވީޑިއޯ ރެކޯޑުކޮށްފައިވަނީ އެ ސަރަހައްދުން ދުއްވަމުން ދިޔަ ކާރެއްގައި އިން ފަރާތަކުންނެވެ. ފުލުހުންގެ ބަހުން، މި މައްސަލަ އެ އިދާރާގެ ސަމާލުކަމަށް އައިސްފައިވަނީ ސޯޝަލް މީޑިއާ މެދުވެރިކޮށެވެ. މިހާރު ފުލުހުން ވަނީ މި މައްސަލައިގެ ތަޙުޤީޤު ފަށާފައެވެ.
މި ކަހަލަ ނުރައްކާތެރި އަމަލުތަކުން ކުޑަކުދިންނާއި މަގުމަތީގެ އެހެން ބޭނުންކުރާ ފަރާތްތަކުގެ ސަލާމަތާއި ރައްކާތެރިކަމަށް ކުރިމަތިވެދާނެ ނުރައްކަލާމެދު ސަމާލުވުމަށް ފުލުހުން އަބަދުވެސް ދަނީ އިލްތިމާސް ކުރަމުންވެ.
