މީދޫ ދާއިރާގެ ރައްޔިތުންގެ މަޖިލީހުގެ މެންބަރު އަދި ވިޔަފާރިވެރިޔާ އަހްމަދު ސިޔާމް މުހައްމަދު، ފާއިތުވި ބޮޑު އީދުގައި ބ. ކަމަދޫން މަޝްހޫރުވި ނެށުންތެރިޔާ އައިމިނަތު ޒާރާއާ ކައިވެނިބައްލަވައިގެންފިއެވެ. 55 އަހަރުގެ ސިޔާމާއި 23 އަހަރުގެ ޒާރާގެ ކައިވެނީގެ ރަސްމިއްޔާތު އިއްޔެ ހަވީރު ބޭއްވުނީ މާލެ އަތޮޅުގައި ހުންނަ ސިޔާމްގެ އޮޅުވެލި ރިސޯޓުގައެވެ. މި ހަފުލާގައި ޒާރާގެ އާއިލާގެ ގިނަ މެންބަރުން ބައިވެރިވިއެވެ.
ލިބިފައިވާ މަޢުލޫމާތުން އެނގޭ ގޮތުގައި މި ކައިވެނީގެ ރަނެއްގެ ގޮތުގައި ޒާރާ ކިޔާފައިވަނީ 2024 ރުފިޔާއެވެ. ނަމަވެސް، މި ކައިވެނީގެ ޚަބަރު ފުރަތަމަ ފެތުރުނު އިރު، ޒާރާ ރަން ކިޔަން ހަމަޖެހިފައި އޮތީ ދެ ގެސްޓް ހައުސްއަށް ކަމަށް ބުނެ އަޑުތަކެއް ފެތުރުނެވެ.
ކައިވެނީގެ ހަފުލާގައި ޒާރާ ލައިގެން ހުރީ ހުދުކުލައިގެ ވެޑިންގ ޑްރެހެކެވެ. ސިޔާމް ހުންނެވީ ހުދު ކުލައިގެ ސޫޓެއްގައެވެ. އޮޅުވެލީގައި ކައިވެނި ޕާޓީ ބޭއްވި ނަމަވެސް، ކަމަދޫގައި ޚާއްޞަ ހަފުލާއެއް ބޭއްވުމަށް ހަމަޖެހިފައިވެއެވެ. މި ހަފުލާއަށް ޝިޔާމްގެ ތިން އަސް ކަމަދޫއަށް ގެންގޮސްފައިވާކަން ފާހަގަކުރެވެއެވެ.
ކައިވެނީގެ ކުރިން ބޭއްވުނު ރަން ކިއުމުގެ ހަފުލާގައި ޒާރާ ލައިގެން ހުރީ ހުދު ކުލައިގެ ދިވެހި ލިބާހެކެވެ. ސިޔާމް ވެސް ހުދު ކުލައިގެ ގަމީހަކާއި ފޭއްޔެއް ތުރުކުރައްވައިގެން ހުންނެވިއެވެ. އެ ހަފުލާގައި ބައިވެރިވި އާއިލާގެ މެންބަރުންނާއި ރައްޓެހިން ވެސް ތިބީ ދިވެހި ސަގާފީ ހެދުމުގައެވެ. ރަން ކިއުމުގެ ހަފުލާގައި ޒާރާ ވަނީ "ރާސްތާ އުޖާލާ މަންޒިލަށް" ނަމުގައި ޚާއްޞަ ލަވައެއް ކިޔައިދީފައެވެ.
މި ކައިވެންޏާ ގުޅޭ ވީޑިއޯތައް ސޯޝަލް މީޑިއާގައި ވައިރަލްވެފައިވާއިރު، ބައެއް ފަރާތްތަކުން މި ކައިވެންޏަށް ވަރަށް ބޮޑަށް ފާޑުކިޔަމުންދެއެވެ. ގިނަ ބައެއްގެ ފާޑުކިޔުން އަމާޒުވެފައިވަނީ ދެމީހުންގެ އުމުރުގެ ތަފާތު ބޮޑުވުމާއި، އާދައިގެ ދިރިއުޅުމެއް އުޅެމުން އައި އަންހެނަކު މުއްސަނދި ވިޔަފާރިވެރިއަކާ ކައިވެނިކުރުމުންކަމަށް ބުނެއެވެ.
