އެންޓި ކޮރަޕްޝަން ކޮމިޝަން (އޭސީސީ) އިން ދިވެހިރާއްޖޭގެ ސިއްޙީ ވެލްފެއާ ނިޒާމާ ގުޅޭ ދިރާސާއެއް މިއަދު އާންމުކޮށްފިއެވެ. 2011 އިން 2023 އަށް އެއްކުރެވުނު މަޢުލޫމާތުގެ މައްޗަށް ބިނާކޮށް ކުރެވުނު މި ދިރާސާއިން، އާސަންދަ މެދުވެރިކޮށް ޚިދުމަތް ފޯރުކޮށްދޭ ތަންތަނުގެ ބިލްތަކަށް ފައިސާ ދޫކުރުމުގައި ކޮރަޕްޝަނަށް މަގުފަހިވާކަން ފާހަގަކޮށްފައިވެއެވެ.
ދިރާސާއިން ފާހަގަކުރެވުނު މައިގަނޑު މައްސަލަތަކުގެ ތެރޭގައި ޤާނޫނީ އޮނިގަނޑުގެ ބަލިކަށިކަމާއި، ޚިދުމަތް ލިބުނުކަން ކަށަވަރުކުރެވޭނެ ނިޒާމެއް ނެތުމާއި، އައު ޚިދުމަތްތަކާއި ބޭސް ރަޖިސްޓަރީކުރުމުގައި ހާމަކަން ކުޑަވުން ހިމެނެއެވެ. އަދި އާސަންދައާއި އެންސްޕާ މެދުވެރިކޮށް ފައިސާ ދޫކުރުމުގައި ހަމަހަމަކަން ގެއްލި، ސިއްޙީ ވެލްފެއާ ނިޒާމު ޒިންމާދާރުކުރުވޭނެ ފަރާތެއް ނެތްކަންވެސް ފާހަގަކުރެވިފައިވެއެވެ.
މި މައްސަލަތަކަށް ހައްލު ހޯދުމަށް އޭސީސީން 20 ލަފައެއް ދީފައިވެއެވެ. މީގެ ތެރޭގައި އާސަންދަ ސްކީމް ދެމެހެއްޓެނިވި ގޮތެއްގައި ހިންގުމަށް ދުރުރާސްތާ ޕްލޭނެއް އެކުލަވާލުމާއި، ޤާނޫނީ އޮނިގަނޑު ހަރުދަނާކުރުން ހިމެނެއެވެ. އަދި ޑޮކްޓަރުންގެ މަސައްކަތްތައް ރެގިއުލޭޓްކުރުމާއި، ބޭހުގެ އަގު ކަނޑައެޅުމުގެ ނިޒާމެއް ޤާއިމުކުރުމާއި، ޚިދުމަތާއި ބޭސް ރަޖިސްޓަރީކުރުމުގެ ޕްރޮސެސް އިތުރަށް ހާމަކުރުން ފަދަ ކަންކަން ވެސް ހިމެނެއެވެ.
އޭސީސީން އިތުރަށް ހުށަހަޅާފައިވާ ކަންތައްތަކުގެ ތެރޭގައި ބޭހާއި ޞިއްޙީ ޚިދުމަތްތަކުގެ އަގު ކަނޑައެޅުމުގެ ޤައުމީ ނިޒާމެއް ޤާއިމުކުރުމާއި، ޚިދުމަތް ލިބުނުކަން ކަށަވަރުކުރެވޭނެ ނިޒާމެއް ތަޢާރަފުކުރުމާއި، އާސަންދައިން ފައިސާ ދޫކުރުމުގެ ނިޒާމު ހަރުދަނާކުރުން ހިމެނެއެވެ. މީގެ އިތުރުން، މުޅި ސިއްޙީ ވެލްފެއާ ނިޒާމުގެ ޖަވާބުދާރީކަން އިތުރުކުރުމާއި، އެންސްޕާއިން އެހީ ދިނުމުގައި ހަމަހަމަކަން ގެނައުމަށް ވެސް ހުށަހަޅާފައިވެއެވެ.
އޭސީސީން މި ދިރާސާގެ ހޯދުންތަކާއި ހުށަހެޅުންތައް ތަންފީޒުކުރުމަށް، ކަމާބެހޭ އެންމެހައި ފަރާތްތަކާ ގުޅިގެން މަސައްކަތްކުރުމަށް އިލްތިމާސްކޮށްފައިވެއެވެ. މިކަމުގެ ސަބަބުން ދިވެހިރާއްޖޭގެ ސިއްޙީ ވެލްފެއާ ނިޒާމުގެ ހަރުދަނާކަން އިތުރުވެ، ކޮރަޕްޝަނަށް ހުޅުވިފައިވާ ދޮރުތައް ބަންދުވެގެންދާނެކަމަށް އުންމީދުކުރެވެއެވެ.
