އާސަންދަ ސްކީމް ހަރުދަނާ ކުރުމަށް އޭސީސީގެ މުހިންމު 20 ލަފައެއް
އެންޓި ކޮރަޕްޝަން ކޮމިޝަން (އޭސީސީ) އިން މިއަދު އާސަންދަ ސްކީމް ހަރުދަނާ ކުރުމަށް 20 މުހިންމު ލަފައެއް ދީފިއެވެ.
މި ލަފާތައް ދީފައިވަނީ ރާއްޖޭގެ ސިއްހީ ވެލްފެއާ ނިޒާމުގައި ކޮރަޕްޝަނަށް އޮތް ހިރާސްތައް ދެނެގަތުމަށް ކުރެވުނު ދިރާސާއެއްގެ އަލީގައެވެ. މި ދިރާސާ ރިޕޯޓު ހާމަކޮށްދެއްވީ އޭސީސީގައި ބޭއްވުނު ޚާއްސަ ރަސްމިއްޔާތެއްގައި ހައުސިން މިނިސްޓަރު ޑރ. އަލީ ހައިދަރުއެވެ.
2011 އިން 2023 އަށް އެއްކުރެވުނު މަޢުލޫމާތުގެ މައްޗަށް ބިނާކޮށް ތައްޔާރުކުރެވުނު މި ދިރާސާގެ މައިގަނޑު މަޤްޞަދަކީ ސިއްހީ ވެލްފެއާ ނިޒާމުގައި ކޮރަޕްޝަނަށް ހުޅުވިފައިވާ ދޮރުތައް ބަންދުކޮށް، ނިޒާމު އިތުރަށް ހަރުދަނާކުރުމެވެ. ދިރާސާއިން ފާހަގަކުރެވުނު މައިގަނޑު މައްސަލަތަކުގެ ތެރޭގައި ޤާނޫނީ އޮނިގަނޑުގެ ބަލިކަށިކަމާއި، ޚިދުމަތް ލިބުނުކަން ކަށަވަރުކުރެވޭނެ ނިޒާމެއް ނެތުމާއި، އައު ޚިދުމަތްތަކާއި ބޭސް ރަޖިސްޓަރީކުރުމުގައި ހާމަކަން ކުޑަވުން ހިމެނެއެވެ.
މި މައްސަލަތަކަށް ހައްލު ހޯދުމަށް އޭސީސީން ހުށަހަޅާފައިވާ ލަފާތަކުގެ ތެރޭގައި އާސަންދަ ސްކީމް ދެމެހެއްޓެނިވި ގޮތެއްގައި ހިންގުމަށް ދުރުރާސްތާ ޕްލޭނެއް އެކުލަވާލުމާއި، ޤާނޫނީ އޮނިގަނޑު ހަރުދަނާކުރުން ހިމެނެއެވެ. އަދި ޑޮކްޓަރުންގެ މަސައްކަތްތައް ރެގިއުލޭޓްކުރުމާއި، ބޭހުގެ އަގު ކަނޑައެޅުމުގެ ނިޒާމެއް ޤާއިމުކުރުމާއި، ޚިދުމަތާއި ބޭސް ރަޖިސްޓަރީކުރުމުގެ ޕްރޮސެސް އިތުރަށް ހާމަކުރުން ފަދަ ކަންކަން ވެސް ހިމެނެއެވެ.
މީގެ އިތުރުން، ފައިސާ ދޫކުރުމުގެ ނިޒާމު ހަރުދަނާކުރުމާއި، މުޅި ނިޒާމު މޮނިޓަރކުރާނެ ފަރާތެއް ކަނޑައެޅުމާއި، އެންސްޕާއިން އެހީ ދިނުމުގައި ހަމަހަމަކަން ގެނައުމަށް ޚާއްސަ ފިޔަވަޅުތަކެއް އެޅުމަށް ވެސް ވަނީ ހުށަހަޅާފައެވެ. މި ހުރިހާ ފިޔަވަޅުތަކެއްގެ މައިގަނޑު މަޤްޞަދަކީ ދިވެހިރާއްޖޭގެ ސިއްހީ ވެލްފެއާ ނިޒާމުގެ ހަރުދަނާކަން އިތުރުކޮށް، އޭގެ ދެމެހެއްޓެނިވިކަން ކަށަވަރުކުރުމެވެ.
