އިންޑިއާއަކީ ރާއްޖެއަށް ދަތިވާ ކޮންމެ ފަހަރަކު ވެސް އެހީތެރިކަން ފޯރުކޮށްދޭ ގައުމެއް ކަމަށާއި ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމަށް އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބައޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު، އިންޑިއާއަށް ކުރައްވާ ދަތުރުފުޅު ފެއްޓެވުމުގެ ކުރިން ބީބީސީއަށް ދެއްވި އިންޓަވިއުއެއްގައި ވިދާޅުވީ ރާއްޖޭގެ މާލީ ހާލަތާ ގުޅޭ ކަންކަން އިންޑިއާ އަށް ވަރަށް ރަނގަޅަށް އެނގޭ ކަމަށާއި އިންޑިއާ އަބަދުވެސް އޮންނާނީ ތަރައްގީގެ ބައިވެރިއެއްގެ ގޮތުގައި ރާއްޖެއަށް އެހީވުމަށް ކަމަށެވެ.
"ތަރައްގީގެ އެންމެ ބޮޑު އެއް ބައިވެރިއެއްގެ ގޮތުގައި، އަޅުގަނޑުމެންނަށް ކުރިމަތިވާ ދަތިކަމުގައި އެހީވާން އޮންނަނީ އަބަދުވެސް ތައްޔާރަށް، ކުރިމަތިވާ ގޮންޖެހުންތަކަށް ހައްލު ހޯދުމަށް،" ރައީސް ޑރ. މުއިއްޒު ވިދާޅުވިއެވެ.
ރައީސް ވިދާޅުވި ގޮތުގައި އެއްވެސް ކަހަލަ ހިޔާލު ތަފާތުވުންތަކެއް ހުރި ނަމަ އެކަން ހައްލުކުރެވޭނީ ފާޅުކަން ބޮޑު ގޮތެއްގައި މަޝްވަރާކޮށް، ދެ ފަރާތުގެ ވިސްނުމުގެ ތެރެއިންނެވެ.
އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ ރައީސް މުއިއްޒު ކުރައްވާ ފުރަމާނަ ދަތުރުފުޅުގައި އެމަނިކުފާނު މިހާރު ވަނީ އިންޑިއާގެ ނިއުދިއްލީ އަށް ވަޑައިގެންފައެވެ. ރައީސް މުއިއްޒު ފުރާވަޑައިގަތީ އިންޑިއާގެ ސަރުކާރުން ހަމަޖައްސައިދިން ހާއްސަ މަތިންދާ ބޯޓެއްގައެވެ.
މިއަދުން ފެށިގެން ބުރާސްފަތި ދުވަހުގެ ނިޔަލަށް ރައީސް މުއިއްޒު އިންޑިއާ އަށް ކުރައްވާ ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ އާއި ބޮޑު ވަޒީރު ނަރެންދްރަ މޯދީ، އަދި އެ ގައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ.
ރައީސް ޑރ. މުއިއްޒަށް ރަސްމީކޮށް މަރުހަބާ ދެންނެވުން އޮންނާނީ މާދަމާ ހެނދުނެވެ. ރައީސް އިންޑިއާ އަށް ވަޑައިގެން ފުރަތަމަ ވެސް ބައްދަލު ކުރައްވާނީ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރުއާއެވެ. އެ ބައްދަލުވުން އޮންނާނީ މިއަދު ހަވީރެވެ.
