ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލްއަށް، އެފްއޭއެމްގެ ފައިސާއިން ގަތްކަމަށް ބުނާ ދެ އެޕާޓްމަންޓް ފުލުހުންނާ ހަވާލުކުރުމަށް ނޯޓިސް ފޮނުވައިފިއެވެ.
މި ނޯޓިސްގައި، އަންނަ އާދިއްތަ ދުވަހުގެ ކުރިން ހުޅުމާލޭގެ އަމީން އެވެނިއުގައި ހުރި ދެ ޕެންޓްހައުސް ފުލުހުންނާ ހަވާލުކުރުމަށް އަންގާފައިވެއެވެ. އަދި މި މުއްދަތުގެ ތެރޭގައި ހަވާލުނުކޮށްފިނަމަ، ފުލުހުންގެ ބެލުމުގެ ދަށަށް އެ ތަންތަން ގެންދާނެކަމަށްވެސް ބަޔާންކޮށްފައިވެއެވެ.
މި އެޕާޓްމަންޓްތައް ގަނެފައިވަނީ ކޮވިޑްގެ ދުވަސްވަރު ފުޓްބޯޅަ ކްލަބްތަކަށް ދިމާވި މާލީ ދަތިތަކުން އަރައިގަތުމަށް އެފްއޭއެމުން، ފީފާ މެދުވެރިކޮށް ނެގި ލޯނު ފައިސާއިންކަމަށް ބެލެވެއެވެ. މި މައްސަލައާ ގުޅިގެން، ބައްސާމްގެ އިތުރުން އެޕާޓްމަންޓް ވިއްކި އަމީން ކޮންސްޓްރަކްޝަން، އެފްއޭއެމްގެ ކުރީގެ ފައިނޭންސް ހެޑް މުހައްމަދު އަގީލް، އަދި އެ އެސޯސިއޭޝަނުގައި އޭރު މަސައްކަތްކުރި ހަސަން ވަހީދުގެ މައްޗަށްވެސް ދަޢުވާކުރުމަށް ފުލުހުން ޕްރޮސިކިއުޓަރ ޖެނެރަލްގެ އޮފީހުގައި އެދިފައިވެއެވެ.
ފުލުހުންގެ ތަޙްޤީޤަށް ހާމަވެފައިވާ ގޮތުގައި، ބައްސާމް މި ދެ ޕެންޓްހައުސް ގަތުމަށް އެފްއޭއެމްގެ ފައިސާއިން 3،084،000 ރުފިޔާ ބޭނުންކޮށްފައިވެއެވެ. އަދި މި މުޢާމަލާތް ފޮރުވުމަށްޓަކައި އެފްއޭއެމުން ކުންފުންޏަކުން ލޯނެއް ނަގައި، އަމީން ކޮންސްޓްރަކްޝަނުން އެފްއޭއެމަށް ފައިސާ ދެއްކިކަމަށް ދައްކުވައިދޭ ޞައްޙަނޫން ލިޔެކިޔުންތައް ތައްޔާރުކޮށްފައިވާކަމަށް ފުލުހުން ތުހުމަތުކުރެއެވެ.
މި ފައިސާއަކީ ފީފާއިން ކޮވިޑް-19ގެ ދަތި ދުވަސްވަރު ކުލަބުތަކަށް އެހީވުމަށް ދިން 1.9 މިލިއަން ޑޮލަރުގެ ތެރެއިން ބައެއްކަމަށް ބެލެވެއެވެ. މި މައްސަލައިގެ ތަޙްޤީޤު ފުލުހުންގެ މޭޖަރ ކްރައިމް އިންވެސްޓިގޭޝަނާއި އިކޮނޮމިކް ކްރައިމްސް ޑިޕާޓްމަންޓުން ކުރިއަށްގެންދާއިރު، ކަމާގުޅޭ ހުރިހާ ފަރާތްތަކެއްގެ މައްޗަށް ދަޢުވާކުރުމަށް ފުލުހުން ވަނީ ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާފައެވެ.
