އިސްރާއީލުގައި ހުރި މުހިންމު އަސްކަރީ އަދި ސަލާމަތީ ތަންތަނަށް އެތައް ބެލިސްޓިކް މިސައިލްތަކެއް ފޮނުވާލާފައިވާކަމަށް އީރާނުން ބުނެފިއެވެ.
އިރާނުން ބުނެފައިވަނީ، މިއީ ގާޒާ އަދި ލެބަނަންގެ ރައްޔިތުންނާއި، ހަމާސް، ހިޒްބުއްލާ އަދި އައި.އާރް.ޖީ.ސީގެ ލީޑަރުންނާއި ކޮމާންޑަރުން އިސްރާއީލުގެ ހަމަލާތަކުގައި މަރާލުމުގެ ބަދަލު ހިފުމުގެ ބަދަލު ހިފުމުގެ ގޮތުން ދީފައިވާ ރައްދު ހަމަލާތަކެއް ކަމުގައެވެ.
އަދި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ބުނެފައިވަނީ، މިހަމަލާތަކުގެ ރައްދުގައި އިސްރާއީލުން ހަމަލާ ދީފިނަމަ، "ފުނޑުފުނޑުކޮށްލާފަދަ" ހަމަލާތަކާ އިސްރާއީލުން ކުރިމަތިލާންޖެހޭނެކަމަށެވެ.
އީރާނުން އެންމެ ފަހުން އިސްރާއީލަށް ހަމަލާދިނީ އޭޕްރިލް 13 ގައެވެ. އެއީ އިސްރާއީލުން ޑަމަސްކަސްގައި އީރާނުގެ ރިވޮލިއުޝަނަރީ ގާޑުގެ 5 މެންބަރުން މަރާލިތާ 12 ދުވަސް ފަހުންނެވެ.
އޭޕްރިލް މަހު އީރާނުން ޖަވާބުދިން ގޮތާއި މިރޭ ފެންނަ މަންޒަރުތަކާ ވަރަށް ތަފާތު މީޑިއާތަކުން ރިޕޯޓު ކޮށްފައި ވެއެވެ. އޭޕްރިލް މަހުގެ ހަމަލާގެ ކުރިން، އެމެރިކާ އަދި ހުޅަނގުގެ ބާރުތަކަށް އީރާނުން ބެކްޗެނަލްތައް މެދުވެރިކޮށް ކުރިން އިންޒާރު ދީފައި ވެއެވެ.
އިރާނުގެ ހަމަލާތަކާއި ގުޅިގެން އިސްރާއީލީ އިސްވެރިން ބުނެފައިވަނީ އެމީހުން ބާރުގެ ބޭނުންކޮށްގެން ޖަވާބުދޭނެ ކަމަށެވެ.
