އދ. ގެ 79 ވަނަ އާންމު މަޖިލީހުގެ އަރިމަތީގައި، ރައީސުލްޖުމްހޫރިއްޔާ އަލްފާޟިލް ޑރ. މުޙައްމަދު މުޢިއްޒު، ފަލަސްޠީނު ދައުލަތުގެ ރައީސް މަޙްމޫދު ޢައްބާސްއާ ބައްދަލުކުރެއްވިއެވެ.
މި ބައްދަލުވުމުގައި ރައީސް ޢައްބާސް ބައިނަލްއަޤްވާމީ މުޖުތަމަޢުއަށް ވަރުގަދަ މެސެޖެއް ދެއްވަމުން ވިދާޅުވީ، "އަޅުގަނޑުމެން ހަނގުރާމަ ހުއްޓާލުމަށް އެދެނީ އަޅުގަނޑުމެންނަކީވެސް އިންސާނުންކަމުން" ކަމުގައެވެ. އަދި ފަލަސްޠީނު ރައްޔިތުންގެ ހާލަތު ރަނގަޅުކުރުމަށް ދުނިޔޭގެ އެހީތެރިކަމާއި އެއްބާރުލުމަށް ގޮވާލެއްވިއެވެ.
ރައީސް ޑރ. މުޢިއްޒު، ކޮންމެ ގޮތަކުންވެސް ފަލަސްޠީނަށް ދިވެހިރާއްޖެއިން ދޭ ވަރުގަދަ އެއްބާރުލުން އަލުން ކަށަވަރުކޮށްދެއްވިއެވެ. އަދި އެމަނިކުފާނު ވަނީ ފަލަސްޠީނު ރައްޔިތުންނަށް އެމީހުންގެ ޙައްޤުތައް ލިބިގެންދާނެކަމުގެ އުއްމީދު އާކުރައްވާފައެވެ. އަދި ފަލަސްޠީނަކީ މިނިވަން ޤައުމެއްގެ ގޮތުގައި ބައިނަލްއަޤްވާމީ ތާއީދު ހޯދުމަށް ދިވެހިރާއްޖެއިން ކުރަމުންދާ މަސައްކަތް ކުރިއަށް ގެންދާނެކަމުގެ ޔަގީންކަން ދެއްވިއެވެ.
ރައީސް ޢައްބާސްވަނީ ދިވެހިރާއްޖެއިން ދިގު މާޒީގައި ފަލަސްތީނަށް ރާއްޖެއިން ދެމުން އަންނަ އެހީތެރިކަމަށް ޝުކުރު އަދާކުރައްވަމުން ވިދާޅުވީ، "ދިވެހިރާއްޖެއިން ފަލަސްޠީނު ރައްޔިތުންނަށް ދެއްވާ އެހީތެރިކަން އަޅުގަނޑުމެންނަށް އަބަދުވެސް އެނގޭ، އަދި ތިޔަ ބޭފުޅުންގެ ދެމެހެއްޓެނިވި އެއްބާރުލުމަށް އަޅުގަނޑުމެން ފުން އިޙްތިރާމް ކުރަން" ކަމުގައެވެ.
މި ދެ ލީޑަރުން ވަނީ ދެ ޤައުމުގެ ދެމެދުގައި އެއްބާރުލުން ދެވިދާނެ ދާއިރާތަކާ މެދުވެސް މަޝްވަރާކުރައްވާފައެވެ.
ބައްދަލުވުން ނިންމަވާލެއްވީ ދެ ރައީސުންވެސް ދެ ފަރާތަށް މުހިންމު ކަންކަމުގައި އެކުގައި މަސައްކަތްކުރުމަށާއި ދިވެހިރާއްޖެއާއި ފަލަސްޠީނާ ދެމެދު އޮންނަ ޑިޕްލޮމެޓިކް ގުޅުން އިތުރަށް ވަރުގަދަ ކުރުމަށް އަޒުމް ކަނޑައަޅުއްވައިގެންނެވެ.
