ސްރީލަންކާގެ އިލެކްޝަންސް ކޮމިޝަނުން މިއަދު ވަނީ ކުރިން އެހާ ބޮޑު ތާއީދެއް ނެތް، މާކްސިސްޓް ސިޔާސީ ލީޑަރ އަނޫރާ ކުމާރަ ދިސަނާޔަކެ އެ ޤައުމުގެ ރައީސްކަމަށް ހޮވިވަޑައިގެންފައިވާކަން އިޢުލާނުކޮށްފައެވެ. ސިޔާސީ ތަޖުރިބާކާރުން ސިފަކުރައްވަމުން ގެންދަވަނީ، މިއީ އެ ޤައުމުގައި ކުރިމަތިވެފައިވާ މާލީ ހީނަރުކަމުން އަރައިގަތުމަށް މިހާރުގެ ރައީސް ޢަމަލުކޮށްފައިވާ ގޮތާ މެދު ހިތްހަމަނުޖެހުން ފާޅުކުރުމުގެ ގޮތުން ސްރީ ލަންކާގެ ރައްޔިތުން ދިން ވޯޓެއްގެ ގޮތުގައި ސިފަ ކޮށްފައެވެ.
ޕީޕަލްސް ލިބަރޭޝަން ފްރަންޓްގެ 55 އަހަރުގެ ލީޑަރު އަނޫރާ ކުމާރަ ދިސަނާޔަކެ ވަނީ ހޮނިހިރު ދުވަހު ބޭއްވުނު އިންތިޚާބުގައި 42.31 އިންސައްތަ ވޯޓު ހޯއްދަވައިގެން ރައީސްކަން ކާމިޔާބުކުރައްވާފައެވެ. އިދިކޮޅު ލީޑަރު ސަޖިތު ޕްރެމަދާސާ ވަނީ 32.76 އިންސައްތަ ވޯޓާއެކު ދެވަނައަށް ވަޑައިގެންފައެވެ.
ސްރީ ލަންކާގެ ރައީސް ރަނިލް ވިކްރަމަސިންގެ – 2022 ގެ އިޤްތިޞާދީ ބޮޑު ކާރިސާގެ ހާލަތު އެންމެ ނުތަނަވަސްވެގެންދިޔަ ދުވަސްވަރު މަޤާމާ ހަވާލުވެ، އައިއެމްއެފްގެ ބެއިލްއައުޓްގެ ޝަރުތުތަކާ އެއްގޮތަށް ހަރުކަށި އަސްޓެރިޓީ ސިޔާސަތުތައް ތަންފީޒުކުރެއްވި ލީޑަރއަށް މި އިންތިޚާބުގައި ކާމިޔާބު ކުރެއްވުނީ އެންމެ 17.27 އިންސައްތަ ވޯޓެވެ. އޭނާ އަކީ ތިންވަނައަށް އެންމެ ގިނަ ވޯޓު ހޯއްދެވި ކެނޑިޑޭޓެވެ. ވިކްރަމަސިންހެ އަދި ބަލި ޤަބޫލުކުރައްވާފައި ނުވިނަމަވެސް، ޚާރިޖީ ވަޒީރު ޢަލީ ސަބްރީ ވިދާޅުވެފައިވަނީ ދިސަނާޔަކެ ކާމިޔާބުކުރެއްވިކަން ސާފުކޮށް އެނގޭ ކަމަށެވެ.
"އަޅުގަނޑު ރައީސް ރަނިލް ވިކްރަމަސިންގެއަށް ވަރަށް ބޮޑަށް ކެމްޕޭންކުރި ނަމަވެސް، ސްރީލަންކާގެ ރައްޔިތުން ވަނީ އެމީހުންގެ ނިންމުން ނިންމާފައެވެ. އަދި އަނޫރާ ކުމާރަ ދިސަނާޔަކެއަށް ދިން މެންޑޭޓަށް އަޅުގަނޑު ފުރިހަމައަށް އިޙްތިރާމްކުރަން" ސަބްރީ ސޯޝަލް މީޑިއާގައި ވިދާޅުވިއެވެ.
އިންތިޚާބު ކޮމިޝަނުގެ އޮފިޝަލުން ބުނާ ގޮތުގައި ދިސަނާޔަކެ މާދަމާ ހެނދުނު ކޮލަމްބޯގައި ހުންނަ ކޮލޯނިއަލް ޒަމާނުގެ ރިޔާސީ އިދާރާގައި ހުވާކުރައްވާނެއެވެ.
