ސްރީލަންކާގެ އިންތިހާބީ ރައީސް އަނޫރާ ކުމާރަ ޑިސަޔަނަކެ އަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެއެވެ.
ސްރީލަންކާގެ ރިޔާސީ އިންތިހާބުގައި ކުމާރަ ޑިސަޔަނަކެ ކާމިޔާބު ހޯއްދެވީ ދެވަނަ ގުނުމަކަށް ނުވަތަ ޕްރިފަރެންސް ވޯޓު ގުނުމަށް ފަހުގައެވެ. މިއީ ފުރަތަމަ ގުނުމުގައި އެއްވެސް ކެންޑިޑޭޓަކަށް 50 އިންސައްތައަށް ވުރެ މަތިން ވޯޓު ލިބިފައި ނުވުމުގެ ސަބަބުންނެވެ.
އުމުރުން 55 އަހަރުގެ ކުމާރާ ޑިސަޔަނަކެ ހޯއްދެވި ކާމިޔާބީއާ ގުޅިގެން ރައީސް މުއިއްޒު އެކްސްގައި ޕޯސްޓެއް ހިއްސާކުރައްވާފައިވެއެވެ. މި ޕޯސްޓުގައި ރައީސް ވަނީ ކުމާރަ ޑިސަޔަނަކެ އަށް މަރުހަބާ ދަންނަވާފައެވެ. އަދި ހަމައެއާއެކު، ރާއްޖެއާއި ސްރީލަންކާއާ ދެމެދު އޮތް ތާރީޚީ ގުޅުން އިތުރަށް ހަރުދަނާކުރުމަށް ކުމާރަ ޑިސަޔަނަކެ އާއެކު މަސައްކަތްކުރުމަށް ޝައުގުވެރިވާ ކަމަށްވެސް ރައީސް ފާހަގަކުރައްވާފައިވެއެވެ.
މި އިންތިޚާބާ ގުޅިގެން، އަނޫރާ ކުމާރަ ޑިސަޔަނަކެ ވެގެންދާނީ ސްރީލަންކާގެ 9 ވަނަ ރައީސަށެވެ.
ޕީޕަލްސް ލިބަރޭޝަން ފްރަންޓްގެ 55 އަހަރުގެ ލީޑަރު އަނޫރާ ކުމާރަ ދިސަނާޔަކެ ސްރީލަންކާގެ ރިޔާސީ އިންތިޚާބު ކާމިޔާބު ކުރެއްވީ ވަނީހޮނިހިރު ދުވަހު ބޭއްވުނު އިންތިޚާބުގައި 42.31 އިންސައްތަ ވޯޓު ހޯއްދަވައިގެންނެވެ. އިދިކޮޅު ލީޑަރު ސަޖިތު ޕްރެމަދާސާ ވަނީ 32.76 އިންސައްތަ ވޯޓާއެކު ދެވަނައަށް ވަޑައިގެންފައެވެ.
ސްރީ ލަންކާގެ ރައީސް ރަނިލް ވިކްރަމަސިންގެ – 2022 ގެ އިޤްތިޞާދީ ބޮޑު ކާރިސާގެ ހާލަތު އެންމެ ނުތަނަވަސްވެގެންދިޔަ ދުވަސްވަރު މަޤާމާ ހަވާލުވެ، އައިއެމްއެފްގެ ބެއިލްއައުޓްގެ ޝަރުތުތަކާ އެއްގޮތަށް ހަރުކަށި އަސްޓެރިޓީ ސިޔާސަތުތައް ތަންފީޒުކުރެއްވި ލީޑަރއަށް މި އިންތިޚާބުގައި ކާމިޔާބު ކުރެއްވުނީ އެންމެ 17.27 އިންސައްތަ ވޯޓެވެ.
