ކޮންމެ ފުރާނައަކީ ވެސް އަގުހުރި އެއްޗެއް ކަމުން، މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ރައީސް ޑރ. މުހައްމަދު މުއިއްޒު މިއަދު އެދިވަޑައިގެންފިއެވެ.
ރާއްޖޭގައި މިފަހަކަށް އައިސް ހިނގަމުން އަންނަ އެކްސިޑެންޓުތައް ގިނަވެފައިވާ އިރު، އެކްސިޑެންޓުތައް ހުއްޓުވުމަށް ކަމާބެހޭ އިދާރާތަކުން ގެންދަނީ ވަރުގަދަ މަސައްކަތްތަކެއް ކުރަމުންނެވެ. އެގޮތުން ފުލުހުން ދަނީ ހާއްސަ ސަމާލުކަމެއް ދީގެން މާލޭގެ މަގުތައް ބެލެހެއްޓުމުގެ މަސައްކަތް ކުރަމުންނެވެ.
އެކްސިޑެންޓުގެ މައްސަލަތަކަށް އާންމުންގެ ސަމާލުކަން މިހާ ބޮޑަށް ލިބުނީ، ހުޅުމާލޭގައި މި މަހު ހިނގި ނުރައްކާތެރި އެކްސިޑެންޓުތަކެއްގައި ދެ ޒުވާނަކު ނިޔާވެފައި ވަނިކޮށެވެ. އޭގެ ފަހުން ވެސް ހުޅުމާލެ އާއި މާލޭގައި ނުރައްކާތެރި އެކްސިޑެންޓުތަކެއް ހިނގައި ބައެއް މީހުންނަށް އަނިޔާވެފައިވެއެވެ.
ރައީސް ޑރ. މުއިއްޒު "އެކްސް" ގައި ވީޑިއޯއެއް އާންމު ކުރެއްވުމަށް ފަހު ވިދާޅުވީ ކޮންމެ ފުރާނައަކީ ވެސް އަގުހުރި އެއްޗެއް ކަމަށާއި ރާއްޖޭގެ މަގުތައް އަމާން ރައްކާތެރި ތަނަކަށް ހެދުމަށް އެންމެން ގުޅިގެން މަސައްކަތް ކުރަން އެބަޖެހޭ ކަމަށެވެ.
"ކޮންމެ ފުރާނައަކީ ވެސް އަގުހުރި އެއްޗެއް ބަލައިގެން ދުއްވާ. މަގުތައް އަޅުގަނޑުމެންނަށް ރައްކާތެރި ތަނަކަށް ހެދުމަށް އެންމެން ގުޅިގެން އެއްބައިވަންތަ މަސައްކަތެއް ކޮށްލަމާ ހިނގާ. އަޅުގަނޑުމެން ގޯސްކޮށް ކުރާ ކަންތައްތައް އަމިއްލަ އަތުން ރަނގަޅު ކުރުމުގެ ދެވަނަ ފުރުސަތެއް ފަހަރެއްގައި ނުލިބިދާނެ." ރައީސް ވިދާޅުވިއެވެ.
ރައީސް އާންމު ކުރެއްވި އެނިމޭޝަން ވީޑިއޯ އިން ފެނިގެން ދަނީ ބައްޕައަކު ދުއްވި ސައިކަލެއް، ކާރެއްގައި ޖެހި އެކްސިޑެންޓު ހިނގާ ތަނެވެ. އެ ކާރު ދުއްވަން އިނީ ދަރިފުޅެވެ. މި އެކްސިޑެންޓަށް ފަހު، ބައްޕަ މި ދުނިޔެއާ ވަކިވާ ތަން ފެނެއެވެ.
