މަރަދޫ ދާއިރާގެ ކުރީގެ މެންބަރު އިބްރާހިމް ޝަރީފަށް ޙަމަލާދިން މީހާއަށް ކްރިމިނަލް ކޯޓުން މިއަދު ޖޫރިމަނާ ޙުކުމެއް އިއްވައިފިއެވެ.
މި ޙަމަލާ ދީފައިވަނީ 2023 ވަނަ އަހަރުގެ ރިޔާސީ އިންތިޚާބުގެ ދެވަނަ ބުރު ކުރިޔަށްދިޔަ ދުވަހުގެ މެންދުރު މަންހަޓަން ބިޒްނަސް ހޮޓެލް ތެރޭގައި ޝަރީފް ހުންނަވަނިކޮށެވެ. މި މައްސަލާގައި ދަޢުލަތުން ސ. ހުޅުދޫ ހެޕީބާރޑް އަޙްމަދު ލައްމާޙު ނިޡާމްގެ މައްޗަށް އަނިޔާއެއް ދިނުމުގެ ދަޢުވާ، މުދަލަށް ގެއްލުން ދިނުމުގެ ދަޢުވާ އަދި އެނގިހުރެ ހުއްދަނޫން ތަނަކަށް ވަނުމުގެ ދަޢުވާ އުފުލާފައިވެއެވެ. އަދި ލ. ގަން-ތުނޑި އުރަހަ އިބްރާހީމް ޔުނައިސްގެ މައްޗަށް މީހަކަށް އަނިޔާއެއް ލިބިދާފަދަ ކުށެއް ކޮށްފާނެ ކަމުގެ ބިރު ދެއްކުމުގެ ދަޢުވާ އުފުލާފައިވެއެވެ.
ކޯޓުން މި މައްސަލަތަކުގައި ކޮށްފައިވާ ޙުކުމްތަކުގައި ބުނެފައިވަނީ މިމީހުން ދަޢުލަތާއެކު އިޢުތިރާފް އެއްބަސްވުމެއް ހަދާފައިވާ ކަމަށެވެ. އެހެންކަމުން ލައްމާޙަށް އަނިޔާއެއް ދިނުމުގެ ދަޢުވާގައި 2400 ރުފިޔާ، މުދަލަށް ގެއްލުން ދިނުމުގެ ދަޢުވާގައި 1800 ރުފިޔާ އަދި ހުއްދަނޫން ތަނަކަށް ވަނުމުގެ ދަޢުވާގައި 800 ރުފިޔާގެ ޖޫރިމަނާ ޙުކުމް އިއްވާފައިވެއެވެ.
ޔުނައިސްގެ މައްޗަށް އިއްވާފައިވަނީ 2400 ރުފިޔާގެ ޖޫރިމަނާ ޙުކުމެކެވެ. ޤާޟީ ޢާއިޝަތު ނުޒުހާ އިއްވެވި ޙުކުމްތަކުގައި މި ފައިސާ 3 މަސް ދުވަހުގެ ތެރޭގައި މީރާއަށް ދެއްކުމަށް އަންގަވާފައިވެއެވެ.
