ފޮތް ކިޔުމަށް ދޯޅު މުޖުތަމައުއެއް އުފެދިއްޖެ ނަމަ، ބޮޑެތި މައްސަލަތަކުގެ ހައްލު ފަސޭހަކަމާއެކު ހޯދުމުގެ ގާބިލްކަން ހުރި ރައްޔިތުންތަކެއް އުފެދޭނެ ކަމުގައި މާލެ ސިޓީ ކައުންސިލްގެ މޭޔަރު އަދި އެމްޑީޕީގެ މާލެ ދާއިރާގެ ރައީސް އާދަމް އާޒިމް މިއަދު ވިދާޅުވެއްޖެއެވެ.
ދުނިޔޭގެ ލިޔަންކިޔަން ދަތުމުގެ ދުވަހުގެ ތަހުނިޔާ ދިވެހި ހުރިހާ ރައްޔިތުންނަށް އަރިސް ކުރައްވައި އާޒިމް "އެކްސް" ގައި ކުރެއްވި ޕޯސްޓެއްގައި ވިދާޅުވީ ލިޔަން ކިޔަން ދަތުމުގެ ރޮނގުން ރާއްޖެ ހާސިލްކޮށްފައި ވަނީ ފަހުރުވެރިން ހައްގު ކާމިޔާބީއެއް ކަމަށެވެ.
މިއީ 1980 ގެ އަހަރުތަކުގައި ރާއްޖޭގައި މިކަމަށް ވަރަށް ބޮޑު އަހަންމިއްޔަތުކަމެއް ދީގެން، ސަރުކާރުން ކުރި މިންނެތް މަސައްކަތުގެ ނަތީޖާ ކަމަށް އާޒިމް ވިދާޅުވިއެވެ.
އާޒިމް ވިދާޅުވި ގޮތުގައި އަސާސީ ތައުލީމުގެ ނަމުގައި ހިންގުނު މި ކެމްޕޭންގެ ސަބަބުން، މިއަދު ރާއްޖެއަކީ ތައުލީމު އުނގެނުމަށް ވަރަށް ބޮޑަށް ސަމާލުކަންދޭ ރައްޔިތަކު ދިރިއުޅޭ ގައުމަކަށް ވަނީ ހެދިފައެވެ. މި މަސައްކަތުގައި އިސްކޮށް އުޅުއްވި ހުރިހާ ބޭފުޅުން ކުރެއްވީ، ޝުކުރު ހައްގު މަސައްކަތެއް ކަމަށް އާޒިމް ވިދާޅުވިއެވެ.
"އަޅުގަޑުމެން ތެރޭގައި ލިޔަކިޔަން ނޭނގޭ މީހުން ވަރަށް މަދުނަމަވެސް، ދުނިޔޭގައި މިވަގުތު ވެސް އެއް ބިލިއަނެންހާ މީހުން ނަށް، ލިޔަން ކިޔަން ނޭނގެއެވެ." އާޒިމް ވިދާޅުވިއެވެ.
އާޒިމް ވިދާޅުވި ގޮތުގައި ދިވެހިން އެންމެ އިސްކަމެއްގެ ގޮތުގައި ދެކެންީ ފޮތް ކިޔަން ޝައުގުވެރި ރައްޔިތެއް ދިރިއުޅޭ، ފޮތްތެރި ގައުމަކަށް، ރާއްޖެ ހެދުމަށެވެ. ޅަފަތުގައި ކުދިންގެ ކިބައިގައި ފޮތް ކިޔުމުގެ އާދަ އަށަގަންނާނެ ގޮތަކަށް، ސްކޫލުތަކުގެ ކިޔެވުން ބައްޓަން ކުރަން ޖެހޭ ކަމަށް އާޒިމް ވިދާޅުވިއެވެ.
ބެލެނިވެރިންނާއި ޓީޗަރުންނަށް، މި ކަމުގައި އަދާ ކުރެވޭނެ ދައުރު ވަރަށް ބޮޑު ކަމަށް ވެސް މާލޭގެ މޭޔަރު ވިދާޅުވިއެވެ.
"ފޮތް ކިޔުމަށް ދޯޅު މުޖުތަމައުއެއް އުފެދިއްޖެ ނަމަ، މިހާރަށް ވުރެ ބޮޑަށް ރާއްޖޭގެ ރައްޔިތުން ހޭލުންތެރިވާނެއެވެ. އޭގެ ސަބަބުން ސިއްހީ މައްސަލަތަކާއި އިޖްތިމާއި މައްސަލަތަކާއި މި ފަދަ އެހެނިހެން ބޮޑެތި މައްސަލަތަކުގެ ހައްލު، ފަސޭހަކަމާއެކު ހޯދުމުގެ ގާބިލުކަން ހުރި ރައްޔިތުންތަކެއް އުފެދޭނެއެވެ." އާޒިމް ވިދާޅުވިއެވެ.
"މިއަދު މި ވިސްނުމުގައި އަޅުގަނޑުމެން މަސައްކަތްތަކެއް ކުރަން ފަށައިގަންޖެހެއެވެ."
