ކުޑަކުއްޖަކަށް ޖިންސީ ގޯނާކުރި މީހަކު 12 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
ކުޑަކުދީންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 3 ވަނަ މާއްދާގެ (ނ) ގެ ދަށުން ޖަލު ހުކުމެއް އައީ ރ. މާކުރަތު، އިމޭޖު، މުޙައްމަދު ދާއޫދުގެ މައްޗަށެވެ.
އެމީހާ ހައްޔަރުކުރި އިރު، ބަރަހަނާ މަންޒަރު ހިމެނޭ ފޮޓޯ އާއި ވީޑިއޯ ފޯނުން ފެނިފައިވާތީ އޮރިޔާން ކާޑު ގެންގުޅުމުގެ ކުށުގެ ދައުވާ ކުރި ނަމަވެސް އެ ކުށް އޭނާގެ މައްޗަށް ސާބިތު ނުވާ ކަމަށް ހުކުމްގައިވެއެވެ.
ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކުން އަމަލު ކުރުމުގެ ގާނޫނުގައިވާ ގޮތުން މީހަކު، ކުޑަކުއްޖެއްގެ ހަށިގަނޑުގައި، ޖިންސީ ނިޔަތެއްއޮވެގެން ޖިންސީ ގުނަވަނެއްގައި ގަސްތުގައި އަތްލައިފިކަމަށްވާނަމަ، އެއީ ކުޑަކުއްޖަކާއެކު ޖިންސީ އަމަލެއް ހިންގުން ކަމުގައި ބެލެވޭނެއެވެ.
އެ ގާނޫނުގައިވާ ގޮތުން އެ ކުށް ސާާބިތުވެއްޖެ މީހެއްގެ އަދަބަކީ 10 އަހަރާއި 14 އަހަރާ ދެމެދުގެ މުއްދަތަކަށް ޖަލަށްލުމެވެ.
މި މައްސަލައަކީ ކުޑަކުއްޖެއްގެ މަސްލަހަތާ ގުޅޭ މައްސަލައަކަށް ވާތީ ކްރިމިނަލް ކޯޓުން ޝަރީއަތް ނިމުނު ގޮތުގެ ރިޕޯޓު އާންމެއް ނުކުރެއެވެ.
