މާލޭގައި ޖިޕަކުން ސައިކަލެއްގައި ޖެއްސި ކަމަށް ބުނާ މައްސަލައެއް ބަލަމުންދާކަމަށް ދިވެހި ފުލުހުންގެ ޚިދުމަތުން މިއަދު ހާމަކޮށްފިއެވެ.
މާލޭގައި ހިނގި މި އެކްސިޑެންޓްގެ މަންޒަރުތައް ސޯޝަލް މީޑިއާގައި މިއަދު ދައުވެފައި ވެއެވެ. އެ ވީޑިއޯގައި ދައްކާ ގޮތުން، ހެލްމެޓް އަޅައިގެން ތިބި ދެ އަންހެނުން ސައިކަލެއްގައި މަޑުކޮށްލައިގެން ތިއްބައި، ކަޅު ކުލައިގެ ޖިޕެއް އައިސް އެ މީހުންގެ ސައިކަލާ ޖެހި، ސައިކަލާއެކު ދެ އަންހެނުންވެސް ވެއްޓުނު މަންޒަރު ފެނެއެވެ.
އެ މަގުގައި ތިބި މީހުން އެ ދެ އަންހެނުންނަށް އެހީވާ މަންޒަރު ފެންނައިރު، ޖިޕު ދުއްވަން އިން ފިރިހެން މީހާވެސް ޖިޕުން ނުކުމެ ވެއްޓުނު އަންހެނުންތަކާ ކައިރިވި ތަން ފެނެއެވެ.
ފުލުހުންގެ މީޑިއާ އޮފިޝަލް މަޢުލޫމާތު ދީފައިވާ ގޮތުގައި، މި އެކްސިޑެންޓް ހިނގާފައިވަނީ އިއްޔެ ހަވީރު މާލޭގައި ހުންނަ މޫކައި ހޮޓަލުގެ ކުރިމަތީގައެވެ. އަދި މި މައްސަލަ ހުށަހެޅިފައިވާ ކަމަށާއި، މިހާރު ބަލަމުން ގެންދާ ކަމަށް ވިދާޅުވެފައިވެއެވެ.
ވީޑިއޯއިން ފެންނަ ގޮތުން، އެކްސިޑެންޓްގައި ޖެހުނު ދެ އަންހެނުންނަށް މާ ބޮޑު އަނިޔާއެއް ލިބިފައިވާކަމަކަށް ނުބެލެވެއެވެ. ނަމަވެސް، މި މައްސަލައިގެ އިތުރު ތަފްސީލު ފުލުހުންގެ ފަރާތުން އަދި ހާމަކޮށްފައެއް ނުވެއެވެ.
