މ. ނާލާފުށީގައި ޕާކުކޮށްފައި ހުރި ސައިކަލެއް ރޭ ދަންވަރު ރޯކޮށްލި މައްސަލައެއް ފުލުހުން ބަލަން ފަށައިފިއެވެ.
މި ހާދިސާއާ ގުޅޭގޮތުން ނާލާފުށި ކައުންސިލުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، ރޭ ދަންވަރު 3:24 ހާއިރު ސައިކަލަކާއި ބައިސްކަލެއްގައި އަލިފާން ރޯވެފައިވާކަމުގައެވެ. މި ހާދިސާގައި ސައިކަލު ބޭނުން ނުކުރެވޭ ވަރަށް އަނދާފައިވާކަމަށާއި، މި މައްސަލަ ވަގުތުން ފުލުހުންނަށް ރިޕޯޓުކުރެވުނު ކަމަށްވެސް ކައުންސިލުން މައުލޫމާތު ދީފައި ވެއެވެ.
މިމައްސަލައާއި ގުޅޭގޮތުން ފުލުހުން ހިއްސާކުރި މަޢުލޫމާތުގައިވާ ގޮތުން، ނާލާފުށީ ސޯސަން މަގުގައި ޕާކުކޮށްފައި ހުރި ސައިކަލަކާއި ބައިސްކަލެއްގައި ރޯކޮށްލާފައިވާ މައްސަލައެއް އެ ޚިދުމަތަށް ރިޕޯޓުކޮށްފައިވެއެވެ. މި މައްސަލަ ފުލުހުން އަންނަނީ އިތުރަށް ތަޙުޤީޤު ކުރަމުންނެވެ.
މިފަދަ ހާދިސާތައް ރާއްޖޭގެ އެކި ރަށްރަށާއި މާލެ ސަރަޙައްދުން ވެސް ދޭތެރެ ދޭތެރެއިން ފެންމަތިވަމުންދާކަން ފާހަގަކުރެވެއެވެ.
