ހަވީރު ރާޅުގަނޑު ސަރަހައްދުގައި ލޯންޗެއް ބަންޑުން ޖަހާލުމުގެ ހާދިސާގައި އަނިޔާވި އެކަކަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އެމަޖެންސީ ޑިޕާޓްމަންޓަށް ގެންގޮސް ފަރުވާދޭން ފަށާފިއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ މަޢުލޫމާތު ދީފައިވާ ގޮތުގައި، މި ހާދިސާ ހިނގިއިރު ލޯންޗުގައި ތިބީ ދެ ދިވެއްސަކާއި ދެ ބިދޭސީއެކެވެ. މި ހަތަރު މީހުން ވެސް ވަނީ ސަލާމަތްކުރެވިފައެވެ. އޭގެ ތެރެއިން ދެ މީހަކަށް ކުދި އަނިޔާތަކެއް ވެފައިވާ ކަމަށް އެމްއެންޑީއެފުން މަޢުލޫމާތު ދެއެވެ.
ނަމަވެސް، މޯލްޑިވްސް ޕޮލިސް ސަރވިސްއިން މަޢުލޫމާތު ދީފައިވާ ގޮތުގައި، އަނިޔާވެފައިވަނީ ދެ ބިދޭސީންނަށެވެ. އަދި މި ހަތަރު މީހުން ސަލާމަތްކުރީ ވެސް ފުލުހުންނެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވި ގޮތުގައި، މި ހާދިސާގައި އަނިޔާވި އެކަކު ހޮސްޕިޓަލަށް ގެނެވި، އެމަޖެންސީ ޑިޕާޓްމަންޓުގައި ދަނީ ފަރުވާދެމުންނެވެ.
އެމްއެންޑީއެފުން އިތުރަށް މަޢުލޫމާތު ދީފައިވާ ގޮތުގައި، ލޯންޗުގެ ވެރިފަރާތުން ވަނީ ދޯންޏެއްގައި ލޯންޗު ކަފުޖަހައިގެން ގެންގޮސްފައެވެ.
ކަނޑު ގަދަވާ ދުވަސްވަރު މިފަދަ ހާދިސާތައް ހިނގުން އާދައިގެ ކަމެއް ނަމަވެސް، މޯލްޑިވްސް މީޓިއޮރޮލޮޖިކަލް ސަރވިސްއިން ޝާއިޢުކޮށްފައިވާ މަޢުލޫމާތުން ދައްކާ ގޮތުގައި މިއަދަކީ ކަނޑު ގަދަ ދުވަހެއް ނޫނެވެ. އެ އޮފީހުން ބުނާ ގޮތުގައި، މާދަމާ ހެނދުނު 6:00 އާ ހަމައަށް ރާއްޖޭގެ ހުރިހާ ސަރަޙައްދެއްގެ ކަނޑުތައް ހުންނާނީ އާދައިގެ މިންވަރަކަށް މަޑުވެފައެވެ. އަދި ވިލާގަނޑު ހުންނާނީ އާދައިގެ މިންވަރަކަށް ގަދަވެފައެވެ.
