ފަލަސްތީނުގެ ހިފާފައިވާ ހުޅަނގު އައްސޭރީގެ ޖެނިންގައި ހަމާސްގެ ލޯކަލް ކޮމާންޑަރެއް އިޒްރޭލު އަސްކަރިއްޔާއިން ޝަހީދު ކޮށްފިކަމަށް އެގައުމުން ބުނެފިއެވެ. މިކަން ހިނގާފައިވަނީ އިޒްރޭލުން ވެސްޓް ބޭންކުގައި ހިންގަމުންދާ ބޮޑު އޮޕަރޭޝަނެއްގެ ތިން ވަނަ ދުވަހުއެވެ.
އިޒްރޭލުގެ އަސްކަރިއްޔާއިން ބުނެފައިވާ ގޮތުގައި ބޯޑަރ ޕޮލިސް ފޯސްއިން މަރާލާފައިވަނީ ވަސީމް ހަޒެމް ކަމުގައެވެ. އޭނާއަކީ ޖެނިންގައި ހަމާސްގެ އިސް މީހާ ކަމަށާއި، ފަލަސްތީނުގެ ސަރަހައްދުގައި ހިންގާފައިވާ ބަޑި އަދި ބޮމުގެ ހަމަލާތަކުގައި ބައިވެރިވެފައިވާ މީހެއް ކަމަށް އިޒްރޭލުން ބުނެއެވެ.
ހަމަ މި ކާރުގައި ދަތުރުކުރި އެހެން ދެ ހަމާސް ހަނގުރާމަވެރިން ފިލަން އުޅުނުއިރު، ޑްރޯންއަކުން އެ ދެމީހުން ވެސް މަރާލާފައިވާ ކަމަށް އިޒްރޭލުން ބުނެއެވެ. އަދި މި ކާރުން ހަތިޔާރާއި، ގޮވާތަކެއްޗާއި، ގިނަ އަދަދެއްގެ ފައިސާ ފެނިފައިވާ ކަމަށްވެސް އިޒްރޭލުން ބުނެއެވެ. މި މީހުން ތިން މީހުން މަރުވެފައިވާކަން ހަމާސްއިން ކަށަވަރުކޮށްދީފައިވެއެވެ. އަދި އެ މީހުންނަކީ ހަމާސްގެ ހަތިޔާރު އުފުލާ ބައި ކަމަށްވާ އަލް-ކައްސާމް ބްރިގޭޑްސްގެ މެންބަރުން ކަމަށް ހަމާސްއިން ބުނެއެވެ.ް
