ޤައުމީ ޔުނިވަރސިޓީން ލާމަރުކަޒީ ނިޒާމަށް ގެންނަން ފެންނަ އިޞްލާޙުތަކުގެ ދިރާސާއެއް އާންމުކޮށްފިއެވެ. މި ދިރާސާ ހާމަކުރެވުނީ އަށް މެންބަރުންގެ ޓީމަކުން ކުރިއަށްގެންދިޔަ ޕްރެޒެންޓޭޝަނަކާ އެކުގައެވެ.
ޔުނިވަރސިޓީން މަޢުލޫމާތު ދެއްވާގޮތުގައި، މިއީ ލާމަރުކަޒީ ޤާނޫނަށް ބޭނުންވާ ބަދަލުތައް ދެނެގަތުމަށް ކުރެވުނު މިނިވަން ދިރާސާއެކެވެ. މި ދިރާސާގައި ލާމަރުކަޒީ ނިޒާމުގެ ތަޞައްވުރުތަކާއި، ގޮންޖެހުންތަކާއި، އަސަރުތައް ދެނެގަތުމަށް އަތޮޅުތަކަށް ދަތުރުކޮށް، އާންމުންގެ ޚިޔާލު ހޯދާފައިވެއެވެ.
ދިރާސާގައި ރާއްޖޭގެ އުތުރު، މެދު އަދި ދެކުނުގެ އަތޮޅުތަކުން މަދުވެގެން 1,155 މީހުންނާ ސުވާލުކޮށްފައިވެއެވެ. ކޮންމެ ސަރަޙައްދަކުން އާބާދީގެ ނިސްބަތުން ކުދި އަދި މެދު ފަންތީގެ ރަށްތަކަށް ޓީމުތައް ދަތުރުކޮށް ސާރވޭ ކުރިއަށް ގެންގޮސްފައިވާކަމަށް ޔުނިވަރސިޓީން ބުނެއެވެ.
ދިރާސާގައި ލާމަރުކަޒީ ޤާނޫނުގެ އުނިކަންކަމާއި، ނިޒާމުގެ މުހިންމުކަމާއި ފައިދާތަކާއި، ގޮންޖެހުންތަކަށް އަލިއަޅުވާލާފައިވެއެވެ. އަދި ކައުންސިލަރުންގެ އަދަދު އާބާދީއާ އެކަށީގެންވޭތޯއާއި، އާބާދީގެ ސައިޒަށް ބަލައި ކައުންސިލަރުންގެ އަދަދު ކަނޑައަޅަންޖެހޭތޯ ވެސް ބަލާފައިވެއެވެ.
ދިރާސާގެ ފައިނަލް ރިޕޯޓު އަންނަ ސެޕްޓެންބަރު މަހު އާންމުކުރާނެ ކަމަށް ޔުނިވަރސިޓީން ބުނެއެވެ. މި ދިރާސާ ކުރުމަށް ޤައުމީ ޔުނިވަރސިޓީއާ ހަވާލުކޮށްފައިވަނީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވުޒާރާއިންނެވެ.
