މޯލްޑިވްސް ޑިވެލޮޕްމަންޓް ބޭންކަކީ ރާއްޖޭގައި އިންވެސްޓްކުރާ ފަރާތްތަކަށް މުހިންމު މަރުކަޒަކަށް ވެގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މުއިއްޒު މިހެން ވިދާޅުވީ ބޭންކުގެ ޗެއާމަންއާއި ސީއީއޯއާ ބައްދަލުކުރެއްވުމުގެ ކުރިން މީޑިއާތަކަށް ދެއްވި ސްޓޭޓްމަންޓެއްގައެވެ. މި ދެ މަގާމަށް އައްޔަނުކުރެވިފައިވަނީ ބައިނަލްއަޤްވާމީ ތަޖުރިބާ ލިބިވަޑައިގެންފައިވާ ދެ ބޭފުޅުންނެވެ.
ބައްދަލުވުމުގެ ކުރިން ރައީސް ނެރުއްވި ވީޑިއޯ މެސެޖެއްގައި ރައީސް ވިދާޅުވީ، މި ބޭންކަކީ ޓޫރިޒަމް، އިއާދަކުރަނިވި ހަކަތަ، ރިއަލްއެސްޓޭޓް އަދި ހައުސިންގ ފަދަ ދާއިރާތަކުގައި އިންވެސްޓްކުރާ ފަރާތްތަކަށް މުހިންމު މަރުކަޒަކަށް ވެގެންދާނެ ކަމަށެވެ.
"މިއީ ވަރަށް މުހިންމު ކަމެއް ފެށިގެން މިދަނީ. ރާއްޖޭގެ އިޤްތިޞާދު ކުރިއެރުވުމަށާއި، އިޤްތިޞާދު ތަފާތު ދާއިރާތަކަށް ފުޅާކުރުމަށް ވެފައިވާ އެންމެ މުހިންމު އެއް ވަޢުދު އެއީ މޯލްޑިވްސް ޑިވެލޮޕްމަންޓް ބޭންކް ގާއިމްކުރުން. އިރާދަކުރެއްވިއްޔާ ބޭންކް ގާއިމްކުރެވުނީ،" ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ބާރުގެ ދަށުން ރާއްޖޭގެ ފުރަތަމަ ޑިވެލޮޕްމަންޓް ބޭންކް އުފެއްދެވީ މެއި 16 ގައެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ ބޭންކުގެ ބޯޑަށް ތިން މެންބަރުން އައްޔަނުކޮށްފައެވެ. އެއީ:
1. އަޙްމަދު ޢަލީ (މއ. ވޭސައިޑް، 805 ފްލެޓް)
2. ސައީދު ޢަބްދުއްނާޞިރު ބިން ސައީދު ޙަސަން އަލް ޖުނައިދު (ސިންގަޕޫރު)
3. ރޮބަޓް ޑެނިއެލް ކާންޓް (އިނގިރޭސިވިލާތް)
